[:gl]Novas[:es]Noticias[:en]News[:]

Galicia sumou 7.400 traballadores máis neste sector durante o pasado mes de xullo.

A recuperación da actividade turística durante os últimos meses volveu a ter consecuencias directas sobre a creación de emprego no sector. Os últimos datos do Ministerio de Inclusión, Seguridade Social e Migracións, correspondentes ao pasado mes de xullo e difundidos polo Ministerio de Industria, Comercio e Turismo, reflicten como o número de traballadores afiliados á Seguridade Social no sector no conxunto de España incrementouse en 143.524 persoas (un 5,6 %) con respecto ao mesmo mes do 2021.

Ese crecemento foi especialmente acusado no ámbito da hostalería, con 198.000 afiliados máis, o que permitiu compensar o descenso rexistrado na área doutras actividades turísticas (60.000 afiliados menos), mentres que as axencias de viaxes e os operadores turísticos experimentaron un lixeiro incremento de 5.000 afiliacións.

Esta mellora xeral do emprego no sector turístico deuse en todas as comunidades autónomas, situándose Galicia como o sétimo territorio en creación de emprego no sector turístico con 7.427 máis afiliados que en xullo do 2021, sendo superada unicamente por Andalucía, Cataluña, Baleares, Canarias, a Comunidade Valenciana e Madrid.

A variación interanual en Galicia foi dun 9 % máis ata sumar un total de 90.101 traballadores afiliados no sector da hostalería e as axencias de viaxes e os operadores turísticos turísticos en xullo deste ano, o que supón o 4,7 % do total estatal de traballadores deses sectores. A práctica totalidade das novas altas corresponden a traballadores asalariados, mentres que o número de autónomos afiliados en Galicia sufriu un pequeno descenso do 0,5 %.