[:gl]Novas[:es]Noticias[:en]News[:]

• A Asociación Española de Cidades do Viño (ACEVIN) seleccionou á localidade pontevedresa como gañadora na primeira edición desta iniciativa.

Cambados será a primeira Cidade Española do Viño.  Ao longo do 2024 a vila pontevedresa ostentará esta distinción, creada pola Asociación Española de Cidades do Viño (ACEVIN) como nova insignia para potenciar o enoturismo e a cultura vitivinícola ligada a pobos e cidades de todo o país.

O municipio resultou elixido durante a celebración da asemblea extraordinaria da agrupación, celebrada en Madrid o pasado luns, 16 de outubro. A implicación e apoio das administracións, asociacións e empresas do territorio, ademais do programa de actividades previsto, foron algúns dos factores que resultaron determinantes para a súa elección. A candidatura presentaba unha relación de actividades a desenvolver ao longo de 2024 vinculadas co viño, turismo, gastronomía e ocio.

Rosa Melchor, presidenta de ACEVIN, destacou as propostas da candidatura, enfocadas a “coñecer, vivir e gozar da viña, do viño e da paisaxe; apoiándose no patrimonio natural, industrial, cultural, as tradicións e o legado vitivinícola do territorio, tendo moi presente o medio e desenvolvemento rural sostible no ámbito territorial enoturístico”.

Ademais de ser socio de ACEVIN, Cambados forma parte da Ruta do Viño das Rías Baixas, integrada na marca Rutas do Viño de España.