[:gl]Novas[:es]Noticias[:en]News[:]

O fin da situación de emerxencia sanitaria vixente desde marzo do ano pasado permitirá tamén ampliar os horarios de apertura.

A boa evolución da situación epidemiolóxica propiciada pola covid en Galicia e o amplo desenvolvemento da campaña de vacinación levaron á Xunta a poñer punto final á situación de emerxencia sanitaria que viña estendendo desde marzo do ano pasado. Esta decisión terá consecuencias directas e inmediatas para o sector da hostalería e o lecer nocturno, así como para outras moitas actividades relacionadas co turismo, que verán como poden recuperar o 100 % da ocupación tanto no interior como no exterior no caso de todas aquelas actividades que dependan do ámbito autonómico.

O final da emerxencia sanitaria repercutirá, así mesmo, nun incremento do horario de apertura para os bares, cafeterías e restaurantes (ata a 1 da madrugada, de domingo a xoves, e ata as 1.30 horas, os venres e os sábados), os pubs (ata as 4 de domingo a xoves, e ata as 4.30, venres e sábado) e as discotecas e as salas de festa (ata as 5 horas todos os días). Si se manterá, no caso do lecer nocturno e dos albergues, a esixencia do certificado de vacinación para minimizar o risco de contaxio e tamén seguirá vixente a obrigatoriedade do uso da máscara en espazos pechados e tamén ao aire libre cando non se poida manter a distancia de seguridade dun metro e medio.

A decisión foi acordada esta semana polo Consello de la Xunta tras consultar aos expertos do comité clínico formado para facer fronte á pandemia e despois das reunións que o vicepresidente da Xunta, Alfonso Rueda, e o conselleiro de  Sanidade, Julio Comesaña, mantiveron esta mesma semana cos representantes da hostalería e o lecer nocturno para coñecer as súas demandas respecto da ocupación e os horarios.