O Camiño de Santiago é un dos reclamos turísticos máis importantes da nosa Comunidade, acumulando un número de visitantes que aumenta ano tras ano. Os peregrinos que chegan á capital galega xa superan en máis dun 30% aos que selaron a súa Compostela o ano pasado.
O Centro Internacional de Acollida ao Peregrino confirmou que este xullo, en plena tempada alta de turismo, produciuse un pequeno retroceso con respecto ao 2022. Segundo os datos recollidos, o mes das festas do Santiago Apóstolo rexistrou un descenso que xira en torno ao 11%.
Todo o contrario sucedeu en setembro, no que unha media de 2.212 peregrinos recibiron a súa Compostela diariamente; mentres que en xullo este número descendía aos 1.968. Trátase dunha tendencia que xa comezou en 2022, cunha diferencia de tan só 30 persoas, e que agora medra cunha diferenza máis notable.
Esta desestacionalización, que o Clúster Turismo de Galicia fomentou durante anos, prodúcese pola procura da comodidade por parte dos peregrinos. Búscase unha estadía máis tranquila, afastándose das aglomeracións dos meses de tempada alta, e evitando a calor da tempada estival, cada vez con temperaturas máis intensas.
Un mes de setembro de récord
A falta de incorporar os datos da derradeira semana do mes, en setembro entregáronse máis de 50.800 Compostelas, unas cifras nunca antes rexistradas neste período. Unha década atrás os datos revelaban un total de 1.029 diarias, cifra que queda curta se a comparamos coas 2.212 actuais. Se nos fixamos nos datos do 2003, vinte anos atrás, estas só chegaban a 334 ao día.