[:gl]Novas[:es]Noticias[:en]News[:]

• O Consello da Xunta informou das diversas actuacións que levarán a cabo para reforzar a calidade e sustentabilidade do destino Galicia.

O Consello da Xunta, celebrado o pasado xoves 4 de abril, anunciou un plan de acción destinado a fortalecer a calidade e sustentabilidade nas empresas turísticas e destinos de Galicia. Cun investimento superior aos 570.000 €, levarán a cabo diversas accións tanto no sector público coma no privado.

O obxectivo principal é consolidar a posición de liderado de Galicia en certificacións de calidade e sustentabilidade turística, especialmente nas contornas do Camiño de Santiago. Para iso, prevese a obtención de 140 novas marcas Q de Calidade e S de Sustentabilidade turística en empresas e servizos públicos durante 2024.

No referido ao sector privado, impulsarase a certificación de calidade en empresas turísticas. O Clúster Turismo de Galicia continuará colaborando coa Axencia Turismo de Galicia para brindar apoio e asesoramento ás empresas na obtención da Q de Calidade Turística e a S de Sustentabilidade. Buscarase manter as entidades certificadas en 2023 e obter polo menos 20 novos certificados Q e outros 20 certificados S este ano. Neste sentido, aumentarase nun 23% a contía das axudas anuais para apoiar aos establecementos e servizos turísticos nos procesos de certificación.

Entre as accións planificadas, inclúese un proxecto conxunto co Instituto para a Calidade Turística Española e a Sustentabilidade (ICTES) para poñer en funcionamento e certificar a S de Sustentabilidade Turística e Q de Calidade Turística en diversos recursos de xestión pública vinculados ao Camiño de Santiago. Ademais, ampliarase a certificación S de Sustentabilidade Turística aos albergues da Rede Pública de Albergues do Camiño de Santiago. Espérase obter 20 novas marcas Q de Calidade e 80 novas marcas S de Sustentabilidade nestas contornas para finais de ano.

Para promover unha maior adhesión ao Sistema Integral de Calidade Turística Española en Destinos (SICTED), continuarán apoiando aos destinos SICTED economicamente. Actualmente, Galicia conta con 18 destinos SICTED certificados e máis de 1.300 servizos turísticos.