[:gl]Novas[:es]Noticias[:en]News[:]

• As empresas galegas desprazadas a Inglaterra mantiveron máis dun cento de encontros co fin de promocionar os seus produtos e o destino Galicia.
• A feira internacional contou coa participación de 4.560 compradores cualificados e coa realización de 29.077 reunións acordadas previamente.

Conclúe a misión comercial do Clúster Turismo de Galicia á World Travel Market de Londres cun bo número de encontros profesionais, con máis dun cento de reunións e novos contactos realizados. A feira internacional celebrouse en Londres entre o 5 e o 7 de novembro no centro de exposicións ExCeL.

Galicia foi unha das comunidades que se integrou na caseta de TurEspaña, onde a Axencia Turismo de Galicia tivo un espazo promocional, no que á súa vez reservou unha zona de reunións que o Clúster Turismo de Galicia puxo ao dispor dos participantes na misión comercial desta feira, unha das citas máis importantes do calendario internacional.

O presidente do Clúster, Cesáreo Pardal; o vicepresidente, Jesús Picallo; o tesoureiro, Alfonso Martínez; e o vogal, Francisco González, encabezaron esta misión integrada por unha decena de empresas e entidades: Tee Travel, Mega Mundo Estrella Galicia, Carris Hoteles, Hotel Carlos I, Pilgrim Travel, Artnatura Galicia, Viajes Interrías, Oca Hotels, Viajes Camino de Santiago e Hotel Pazo de los Escudos.

A xornada inaugural permitiulles intercambiar impresións cos máximos responsables da delegación española: o ministro de Turismo, Héctor Gómez, e a secretaria de Estado para o Turismo, Rosana Morillo. Ademais disto, puideron conversar co alcalde de Málaga, Francisco de la Torre Prados.

O director da Axencia Turismo de Galicia, Xosé Manuel Merelles, sinalou a importancia deste segmento de mercado, que este ano acadou os mellores datos desde que se teñen rexistros. O inglés é o quinto mercado internacional máis importante para Galicia, cunha demanda hoteleira que está medrando especialmente fóra da tempada alta.