[:gl]Novas[:es]Noticias[:en]News[:]

A entidade estivo presente nos workshops organizados pola Deputación de Pontevedra e nos que unha trintena de empresas e entidades da provincia puideron establecer contactos con máis de 160 operadores andaluces e vascos.

Dúas cidades con gran potencial para o mercado turístico galego foron as elixidas pola Deputación de Pontevedra para realizar en días pasados senllos workshops e promocionar alí o destino Rías Baixas co “obxectivo de fomentar a desestacionalización e a competitividade, e incrementar a captación de visitantes en mercados emisores de interese”. Á iniciativa sumouse tamén o Clúster Turismo de Galicia, que estivo presente tanto en Sevilla como en Bilbao xunto cunha trinta empresas e entidades do sector turístico provincial: aloxamentos, restaurantes, adegas, museos e outros negocios do sector da oferta complementaria.

Tanto na capital andaluza (o mércores 19) como na cidade vasca (o xoves 20), desenvolvéronse dous workshops nos que os representantes das empresas Alda Hotels, Always Spain Incoming, Bodegas Terras Gauda, Casa do Sear, Celtravel, Circuitos Galicia, Galicia Villas, Gran Talaso Hotel Sanxenxo, Hotel Attica21 Vigo, Hotel Bahía de Vigo, Hotel Ciudad de Vigo y Hotel Axis Vigo, Hotel Oca Ipanema, Hotel Pirámide, Hotel San Luis, Hotel Spa Nanín Playa, Hotel Talaso Atlántico, Hotel Villa Covelo, Hotel Zenit Vigo, Paco & Lola, Pazo Los Escudos Hotel Spa & Resort, Sailway, Simply Galicia, Tee Travel, Viajes Interrías e Vio Viajes, e do Museo de Pontevedra, o Castelo de Soutomaior, o Castelo de Sobroso e a Ruta do Viño Rías Baixas puideron establecer contactos con máis de 160 maioristas e comercializadores locais.

O programa de ambos workshops, enmarcados no Plan Estratéxico de Turismo 2021-23, incluíu tamén unha actuación musical a cargo da artista pontevedresa Cora Velasco e unha degustación gastronómica preparada polo cociñeiro Adrián Albino, responsable do restaurante Niño Corvo, con produtos das denominacións de orixe pontevedresas.

O presidente Cesáreo Pardal e o vicepresidente Jesús Picallo representaron ao Clúster nestas actividades, nas que tamén estivo presente o directivo da entidade e presidente do Consorcio de Empresarios Turísticos de Sanxenxo, Alfonso Martínez. A presidenta da Deputación de Pontevedra, Carmela Silva, encabezou a comitiva en Bilbao.