[:gl]Novas[:es]Noticias[:en]News[:]

Unha decena de establecementos participan na nova convocatoria deste programa da Deputación de Pontevedra que ofrece máis de 4.400 prazas.

O turismo termal e o envellecemento activo vólvense dar a man en Pontevedra grazas á nova convocatoria de Depotermal, un programa impulsado pola Deputación pontevedresa que incentiva a actividade turística nos períodos de menor demanda poñendo algúns establecementos ao servizo da mellora da calidade de vida de parte da poboación. Depotermal está dirixida ás persoas nadas antes do 1 de xaneiro de 1972 ou que nacendo en datas posteriores perciban algunha pensión ou teñan unha discapacidade superior ao 64 %, pero que se poidan valer por si mesmas na súa vida diaria.

Os solicitantes poderán acceder a dous programas diferentes nunha decena de balnearios, talasos e spas da provincia: asistencia diaria durante cinco xornadas consecutivas de mañá ou tarde ou asistencia con aloxamento en réxime de pensión completa de domingo a venres. O primeiro programa oferta un máximo de 1.248 prazas e o segundo, 3.186, o que eleva a máis de 4.400 o número total de prazas desta convocatoria de Depotermal. A Deputación subvenciona parte do custo do programa con axudas que varían en función da renda do solicitante e que poden alcanzar o 40 % do importe total.

Os establecementos participantes no programa de Asistencia diaria son o Palacio del Agua (Mondariz), o Hotel Exe Vía Argentum (Silleda), o Balneario Termas de Cuntis, o Hotel Spa Galatea (Portonovo, Sanxenxo) e o Hotel Spa Novo Astur(Vilalonga, Sanxenxo). Os tres últimos ofrecen tamén o programa con aloxamento, do mesmo xeito que o Gran Hotel Talaso Sanxenxo, o Hotel Spa Carlos I Silgar (Sanxenxo), o Hotel Spa Norat Torre do Deza (Lalín) e o Hotel Spa Nanín Praia (Sanxenxo).

O prazo para presentar as solicitudes iniciouse o 4 de abril e estará aberto ata o 3 de maio a través da sede electrónica da Deputación de Pontevedra.