[:gl]Novas[:es]Noticias[:en]News[:]

O Clúster Turismo de Galicia colaborou no proceso de redacción do documento.

As empresas do sector turístico que queiran avanzar pola senda da sustentabilidade dispoñen dunha nova ferramenta para facelo. Acaba de poñela ao seu alcance o Ministerio de Industria, Comercio e Turismo e a Secretaría de Estado de Turismo a través de Segittur (Sociedade Mercantil Estatal para a Xestión da Innovación e as Tecnoloxías Turísticas), entidade que acaba de lanzar unha Guía para a elaboración de memorias de sustentabilidade en pemes turísticas. Nos traballos desenvolvidos para preparar esta guía colaborou o Clúster Turismo de Galicia xunto a outra ducia de representantes do sector de toda España.

Desde Segittur explican que as memorias de sustentabilidade recollen o “desempeño ambiental, social e económico” da empresa e permiten aos seus clientes e usuarios coñecer como actúa no ámbito da sustentabilidade. Na actualidade, só están obrigadas a elaboralas as grandes empresas, pero a guía permitirá ás pequenas e medianas empresas adiantarse a un posible cambio normativo respecto diso. Ademais, a elaboración voluntaria dunha memoria de sustentabilidade “outorga recoñecemento, boa imaxe, alta reputación e xera confianza nos grupos de interese”, permite ás empresas que o fan “crear unha imaxe de marca que se vexa asociada a unha xestión de sustentabilidade eficiente” e pode atraer aos consumidores que buscan propostas e experiencias turísticas que “que impactan positivamente no ámbito social, ambiental e económico”.

A memoria de sustentabilidade debe recoller aspectos relativos ao modelo de negocio da empresa (descrición, resultados, riscos, loxística…), as súas políticas ambientais (xestión de residuos, uso dos recursos, medidas de protección da biodiversidade…), a xestión do persoal (emprego, organización do traballo, seguridade, formación…), os dereitos humanos (cumprimento dos convenio da OIT), a loita contra a corrupción (medidas contra o branqueo de capitais, achegas a oenegués..) e o compromiso coa sociedade (desenvolvemento sostible, consumidores, información fiscal…).

A guía elaborada por Segittur non só recolle unha descrición pormenorizada da estrutura que debe ter a memoria (carta da dirección, presentación da empresa, índice, perfil da entidade, xestión interna, etcétera), senón tamén os pasos a seguir para reunir a información necesaria e algúns exemplos reais de boas prácticas  extraídos das memorias de sustentabilidade de varias empresas. Ademais, a guía compleméntase cun kit de ferramentas para a elaboración da memoria que se pode descargar tamén desde a web de Segittur.