[:gl]Novas[:es]Noticias[:en]News[:]

• O Clúster e a marca turística ‘Galicia Destino Sostible’ participaron nesta convención o pasado martes, 19 de novembro.

O Clúster Turismo de Galicia mantén a súa aposta pola internacionalización do destino. O martes, 19 de novembro, celebrouse unha nova edición da convención MAST Sales Sensation de Chicago, un evento que organiza de xeito anual a entidade MAST Travel Network e que integran máis de 300 operadores turísticos estadounidenses. Con esta, o Clúster suma xa dúas participacións no workshop de Chicago.

O CTG participou cos catálogos Galicia Travel Agencies e Galicia, un luxo para os teus sentidos, ademais de coa marca turística ‘Galicia Destino Sostible’, iniciativa do Clúster que conta co apoio da Xunta de Galicia-Turismo de Galicia. Durante a celebración do evento, mantivéronse ata 85 reunións con operadores turísticos estadounidenses, establecendo novos contactos clave, pois moitos deles eran propietarios das axencias de viaxe que representaban.

O evento conformouse coma unha grande oportunidade para dar a coñecer Galicia a aqueles turoperadores que descoñecían o destino Galicia, así como para reforzar as cualidades e oportunidades que ofrece o noso territorio aos que xa lles soaba.