[:gl]Novas[:es]Noticias[:en]News[:]

Para que o Xacobeo 2021 sexa para todos e con todos, desenvolverase o Xacobeo Cidades e o Xacobeo en Camiño á vez que a sustentabilidade será transversal en todo o desenvolvemento da programación que se está comezando a esbozar e que se desenvolverá en toda Galicia ao longo dos dous próximos anos. Foros de diálogo con líderes mundiais; congresos e encontros académicos internacionais e visitas de referentes destacados a Galicia, adeás de tres grandes exposicións debuxarán o Ano Santo: a mostra “Galicia, un relato non mundo”, que xa está en marcha; “Galicia de Nós a Nós”, coa que se celebrará o centenario da conformación da Xeración Nós; e “Galicia Futuro”. Por último avanzouse tamén sobre o proxecto “3Camiños”, unha serie de ficción que se rodará en 3 continentes e 5 países, e que se distribuirá internacionalmente

O presidente do Goberno galego, Alberto Núñez Feijóo, avanzou algunhas das accións nas que se está traballando para a celebración do próximo Ano Santo. Neste sentido, Feijóo avanzou que galegos e visitantes gozarán de 10 actividades ao día e 313 escenarios para celebrar o Xacobeo da mellor Galicia durante os próximos dous anos. “Ao longo de 2020 e 2021, Galicia vivirá os primeiros 700 días dos 5.000 que temos por diante da década xacobea”, dixo, subliñando que o avance da Programación do Xacobeo 2021.

Baixo a previsión dunha asistencia a todos os eventos de máis de 7 millóns de persoas, Feijóo aseverou que, aínda que o escenario principal será Santiago, haberá outros 312 por toda a Comunidade, coa posta en marcha de máis de 180 proxectos nos que se inclúen máis de 7.000 actividades. Para facer un Xacobeo 2021 para todos, con todo e en toda Galicia, o responsable do Executivo autonómico aseverou que o obxectivo é “que abarque toda Galicia, que haxa actos en toda Galicia e que os actos sexan numerosos en contidos”.

Festivais musicais, programas e exposicións
Ao fío disto, referiuse á posta en marcha de numerosas iniciativas que demostran o compromiso da Xunta con este fin como: o programa O teu Xacobeo, grazas ao cal os galegos están a facer realidade centos de proxectos artísticos, culturais, sociais ou innovadores en toda a Comunidade, cun apoio de 8 millóns de euros; ou o Son do Camiño, “que está entre o catro festivais máis importantes de España e só leva dúas edicións” -dixo-, no Monte do Gozo. Un evento xa consolidado e ben rodeado durante o verán das demais citas que conforman Fest Galicia, coa que se confirma a nosa terra como destino musical.

No apartado da edición literaria, xa están en marcha dúas publicacións baixo o título A Catedral de Santiago: unha visión integral. A restauración e conservación da Catedral 2011-2027, que farán accesible para o público non especializado a fascinante historia da Catedral, desde o inicio da súa construción até os nosos días, co relato de destacados especialistas.

Así mesmo, e para que o Xacobeo 2021 sexa para todos e con todos, desenvolverase o Xacobeo Cidades, con música, artes escénicas ou exposicións organizados en colaboración cos concellos da Coruña, Ferrol, Lugo, Ourense, Vigo e Pontevedra; e cunha programación na que están contempladas 120 actividades e ás que está previsto que asistan máis de 300.000 persoas.

Co mesmo espírito organizarase, tamén, o Xacobeo en Camiño, co que se chegará ás principais vilas e cabeceiras de comarca, uns 76 concellos, a través de 1.400 actividades. “Serán Son do Camiño en miniatura, con actuacións que durarán dúas ou tres días en cada municipio, neste caso con artistas exclusivamente galegos”, explicou, co obxectivo de chegar a 400.000 persoas.

Un Camiño de Santiago sustentable e que respecta ao medio ambiente
Despois de lembrar outras iniciativas como o Plan de mellora de aloxamentos turísticos ou o programa Elixe Galicia, como aposta polo turismo interno, o presidente da Xunta asegurou que o Camiño de Santiago e o Xacobeo estarán vinculados á sustentabilidade, á ecoloxía e ao respecto polo medio ambiente.

Así, de face a un Camiño impacto cero, terase en conta en toda a programación cultural o principio de sustentabilidade e aplicaranse medidas como a reutilización e a reciclaxe de plásticos, incrementarase o uso de enerxías renovables, se reforestarán espazos con especies autóctonas e desenvolveranse distintas iniciativas para o embelecemento da paisaxe e a contorna.

“Ademais mellorarase a accesibilidade para facer un Camiño diverso, impulsarase o labor dos voluntarios en múltiples facetas e promoveranse proxectos de rehabilitación específicos de bens de interese cultural e etnográficos”, anunciou.