[:gl]Novas[:es]Noticias[:en]News[:]

• O tren turístico permitirá visitar tres xardíns galegos que contan coa certificación de Excelencia Internacional.
• Terá saídas os días 9 e 23 de marzo, e os billetes xa están dispoñibles para a súa compra.

A nova edición dos Trens Turísticos de Galicia dará comezo este mes de marzo co Tren da Camelia en Flor, que percorrerá durante dúas xornadas a Ruta da Camelia. A iniciativa, da Xunta de Galicia, Renfe e Inorde, permite coñecer recunchos da comunidade galega a bordo dun tren.

O Tren da Camelia en Flor terá saídas os días 9 e 23 de marzo, e os billetes xa están dispoñibles para a súa compra a través das plataformas habituais: en calquera estación de Renfe, na súa web e en venda telefónica.

As camelias chegaron a Galicia a finais do século XVIII, procedentes de países remotos como China e Xapón. Inicialmente instaláronse nos pazos de casas señoriais da nobreza galega, mais co tempo introducíronse en xardíns e fincas de toda a xeografía, convertendo a Galicia en referente internacional no cultivo e produción desta planta. A nosa comunidade atesoura preto de 8.000 variedades diferentes de camelia.

Coincidindo co período de floración da camelia, a través desta ruta visitaranse xardíns que contan coa certificación de Excelencia Internacional. O primeiro será o do Pazo Quinteiro da Cruz, en Ribadumia, no que florecen máis de 5.000 exemplares de camelias de máis de 1.500 variedades a partir da que elaboran o seu propio té e que, ademais, os viaxeiros poderán degustar. O segundo será o do Castelo de Soutomaior, coñecendo o seu xardín de camelias con nomes de muller: Rosalía de Castro, María Casares ou Bella Otero. Finalmente, o terceiro será o do Pazo de Rubians, que conta con máis de 800 variedades de camelias e unha finca de albariño, viño que se degustará ao rematar a visita.