[:gl]Novas[:es]Noticias[:en]News[:]

• O Clúster Turismo de Galicia, no marco dos convenios de colaboración formalizados pola Axencia de Turismo de Galicia-Xunta de Galicia, realizou un proceso de avaliación sobre a certificación Q de Calidade Turística.

O Clúster Turismo de Galicia, no marco dos convenios de colaboración formalizados pola Axencia Turismo de Galicia-Xunta de Galicia, vén de realizar un proceso de avaliación sobre a certificación Q de Calidade Turística no ámbito privado para Galicia. A marca de garantía Q de Calidade Turística é unha marca dirixida á certificación voluntaria que acredita a calidade dos servizos turísticos, concretamente, a xestión, servizos e infraestruturas das organizacións turísticas. Actualmente, existen un total de 349 entidades que contan co recoñecemento, situando a Galicia coma a segunda comunidade autónoma en número de certificacións.

O proceso de avaliación levado a cabo polo Clúster construíuse sobre catro grandes eixes: o atractivo da certificación, as axudas vinculadas á certificación, unha avaliación do servizo de consultaría ofrecido polo Clúster Turismo de Galicia, e suxestións e retroalimentación xeral. O proceso, cunha marxe de erro do 5,94% e un nivel de confianza do 95%, contou coa participación de 132 empresas.

Unha das principais problemáticas ou necesidades por parte das empresas é o coñecemento que o público xeral pode ter da certificación Q, acadando esta cuestión unha puntuación media do 6,21 (nunha escala do 1 ao 10).

Con relación aos posibles beneficios que pode achegar este selo de calidade, na enquisa déronse catro opcións para seleccionar, ademais de deixar a posibilidade de incluír outros beneficios ou respostas. O beneficio máis representativo é o de transmitir o concepto de fiabilidade ou profesionalización para os turistas (66,9%). Moi preto sitúase o beneficio de mellorar a xestión empresarial (55,9%) e o de axudar a diferenciarse da competencia (46,2%). A cuarta opción, que sinalaba a percepción de que a certificación axuda na promoción da empresa/entidade, acadou un 16,9%.

No que respecta a nivel de satisfacción, a maior parte das empresas enquisadas están satisfeitas ou moi satisfeitas coa certificación Q de Calidade Turística: a valoración media sitúase nun 8,37 (nunha escala do 1 ao 10). Un dato que confirma que, a nivel empresarial, este certificado se valora moi positivamente.

No marco dos convenios de colaboración, o Clúster puxo a disposición das organizacións turísticas un servizo de consultaría gratuíto para a obtención e/ou mantemento da Q de Calidade. No proceso de avaliación, as empresas/entidades que recibiron o servizo tamén valoraron a súa calidade. A maior parte dos enquisados aproba o servizo de consultaría con boa nota, cunha resposta media que se sitúa en torno a un 8,43 (nunha escala do 1 ao 10).

Conclusións

A maior parte das valoracións relativas á certificación Q de Calidade son positivas. Este recoñecemento de calidade axuda a transmitir unha serie de garantías aos turistas e a achegar valor engadido á empresa.

Por unha banda, un dos aspectos máis demandados é o relativo á promoción e posta en valor deste certificado de cara ao público: os clientes non coñecen o que implica esta certificación, polo que se fai necesaria unha maior promoción que axude a poñer en valor aquelas entidades que acadaron a Q de Calidade. Por outra banda, destaca positivamente o labor de comunicación das axudas que Turismo de Galicia pon a disposición das empresas interesadas na certificación, pois practicamente a totalidade dos enquisados coñecía este programa de axudas.