[:gl]Novas[:es]Noticias[:en]News[:]

A Asociación Provincial de Empresarios de Hostalería e Turismo de Lugo difundirá os atractivos gastronómicos e turísticos da provincia cunha caseta que percorrerá todas as saídas de etapa da proba ciclista.

Despois de varias edicións nas que Galicia foi unha dos seus grandes protagonistas, a principal competición ciclista española, La Vuelta, afástase este ano das estradas galegas, pero non permanecerá allea aos encantos que esta terra pon ao alcance de todos os que se achegan ata ela. Un ano máis, e xa van dez, a Asociación Provincial de Empresarios de Hostalería e Turismo de Lugo, Apehl, (entidade adherida ao Clúster Turismo de Galicia) acompañará ao pelotón cunha caseta da campaña …E para comer, Lugo, que servirá para difundir os atractivos gastronómicos e turísticos da provincia na saída de cada etapa de La Vuelta.

A iniciativa foi presentada en días pasados polo presidente de Apehl, Jacobo García-Bobadilla; o vicepresidente segundo da Xunta e conselleiro de Presidencia, Xustiza e Deportes, Diego Calvo; a directora de Turismo de Galicia, Nava Castro, e o director de La Vuelta, Javier Guillén, ademais doutras autoridades e representantes dalgunhas das entidades colaboradoras. Os consellos reguladores de Ribeira Sacra, Ternera Gallega, Queso Arzúa-Ulloa, Queso de O Cebreiro, San Simón da Costa, Queso de Tetilla, Pataca de Galicia, Castaña de Galicia, Asociación de Avicultores da Raza Galiña de Mos (Avimós), Asociación de Criadores da Raza Ovella Galega (Asovega), Asociación de Criadores de la Raza Porcina Celta (Asoporcel), Fabas de Lourenzá, Armadores de Burela, Grelos de Galicia, Pementos de Mougán, Mel de Galicia, Asociación Provincial de Fabricantes de Pan de Lugo (Afapan), Galletas Daveiga, Aceite de Quiroga e a Asociación Nacional de Criadores de Raza Rubia Gallega (Acruga) estarán presentes na caseta de …E para comer, Lugo

A cidade de Utrecht (Países Baixos) é o punto de partida desta edición de La Vuelta, que concluirá o 11 de setembro en Madrid e na que tomarán parte case douscentos ciclistas de 23 equipos diferentes.