Clúster

A feira alemá celebrará o 19 de marzo un evento networking para poñer en contacto a profesionais e provedores de todo o mundo.

As consecuencias da pandemia afectan de novo ao desenvolvemento da ITB Berlín. O ano pasado a feira turística alemá optou por celebrar unha edición virtual e nesta ocasión os seus responsables decantáronse por un formato híbrido no que volverá primar o uso das novas tecnoloxías para favorecer a participación e evitar os riscos e condicionantes aínda presentes. Nesta situación, os actos centrais da convención ITB Berlín para os días 8, 9 e 10 de marzo complementaranse o día 17 co ITB Dixital Business Day, unha xornada pensada para “ofrecer aos profesionais e provedores do mercado turístico de todo o mundo a oportunidade de establecer contactos desde calquera parte do mundo”.

As empresas galegas tamén estarán presentes nesta actividade do día 17 grazas á intermediación do Clúster Turismo de Galicia, que xestionará e abonará os gastos de inscrición de quen queira tomar parte no networking. Os interesados teñen de prazo ata o xoves 24 de febreiro para poñerse en contacto co Clúster a través do email secretariatecnica@clusterturismogalicia.com indicando o nome da empresa, a dirección e o teléfono, o nome e apelidos do representante da mesma e un email e un teléfono de contacto.

Desde a ITB Berlín explican que a xornada ”ofrece aos compradores e provedores que aínda non se beneficiaron dos servizos da feira, a oportunidade de establecer contactos e facer negocios. Céntrase na creación de redes e os negocios e compleméntase con sesións da Convención ITB do programa a demanda”. Os participantes poden proporcionar detalles sobre os seus intereses comerciais, en base aos cales recibirán suxerencias de contactos cos que se reunirán en sesións de audio e vídeo. Ademais, poderán participar en dúas sesións de Speed ​​ Networking dunha hora nas que, en función dos seus intereses, asignaránselles varios compañeiros de reunión.