Clúster

O bono turístico posto en marcha polo Clúster e a Xunta permitiu inxectar 300.000 euros no sector durante ese período.

As boas perspectivas coas que o sector turístico galego afrontou a pasada ponte de Todos os Santos víronse confirmadas e a afluencia de visitantes permitiu aos establecementos achegarse, e nalgúns casos lograr, ao cheo total. Xa o avanzaba nos días previos o presidente do Clúster Turismo de Galicia, Cesáreo Pardal, ao sinalar que se prevía unha porcentaxe de ocupación de entre o 85 e o 95 %. E así o confirmou esta semana, finalizado xa a ponte, o vicepresidente primeiro da Xunta, Alfonso Rueda. O tamén conselleiro de Presidencia, Xustiza e Turismo explicou que, a pesar das choivas, a ocupación media durante esa longa fin de semana situouse entre o 85 e o 90 %, e que nalgunhas zonas concretas da comunidade chegou mesmo ao 100 %,.

Alfonso Rueda explicou que na consecución destas boas cifras xogaron un papel especial tanto o turismo rural como o termalismo e avogou por seguir potenciando ambos sectores fóra da tempada alta. Así mesmo, destacou que Galicia é un destino turístico que está de moda, tal como o demostran os datos que reflicten a recuperación do sector tras a pandemia.

O bono turístico posto en marcha pola Xunta e o Clúster baixo o lema #QuedamosEnGalicia tamén xogou un papel importante nos bos resultados do sector durante a pasada ponte. Entre o venres 29 de outubro e o luns 1 de novembro realizáronse un total de 1.400 operacións co devandito bono, o que supuxo unha inxección económica no sector de 300.000 euros. Desde o mes de xuño xa foron xa 14.417 operacións realizadas e 2.891.483 os euros os mobilizados. A previsión da Xunta é que ao termo do presente ano o diñeiro inxectado no sector grazas á esta iniciativa chegue aos 7,8 millóns de euros.

En paralelo á campaña #QuedamosEnGalicia desenvolveuse tamén o programa #ElixeGalicia, destinado a menores de 30 anos, familias e maiores de 55 anos, que puideron beneficiarse dunha oferta de máis de 4.300 prazas nas catro provincias galegas. Neste caso a inxección económica que recibiu o sector turístico no que vai de ano supera o millón de euros.