Clúster

• Galicia é a segunda comunidade onde máis medrou a ocupación no sector, cunha repunta do 18% entre abril e xuño

O Instituto Nacional de Estatística (INE) publicou a Enquisa de Poboación Activa (EPA) do segundo trimestre de 2023, correspondente aos meses de abril, maio e xuño. A medida que o sector se recuperou da crise da pandemia, o número de persoas empregadas foi aumentando, chegando no segundo trimestre deste ano aos 2,86 millóns de traballadores vinculados ás actividades turísticas. Segundo estes datos, un de cada catro novos empregos que se xeran en España pertencen ao sector turístico. En concreto, entre abril e xuño, as actividades vinculadas ao turismo rexistraron 146.678 empregados máis que no mesmo período de 2022.

Galicia é a segunda comunidade na que máis medrou o emprego nas actividades turísticas, cunha repunta do 18,3%; situándose tan só por detrás da Rioxa, cun incremento do 40,1%. Durante o segundo trimestre deste ano rexistráronse máis de 130.000 postos ocupados, fronte aos 109.900 do mesmo período no 2022, polo que nos últimos doce meses Galicia sumou máis de 20.000 novos traballadores no sector turístico.

Máis ocupación, menos paro

A economía nacional rexistrou unha taxa de paro do 11,6%, mentres que a porcentaxe das actividades turísticas foi do 8,5%. Con todo isto, esta cifra rexistra medio punto máis que a taxa rexistrada este ano, mais desde Turespaña indican que isto débese ao aumento da poboación activa no sector, que encadea catro trimestres consecutivos de incrementos.

No sector, as mulleres en desemprego (9,1%) son máis que os homes (7,9%), pero en ámbolos casos o número descendeu con respecto ao ano pasado, onde as mulleres tiñan unha taxa de desemprego do 9,4%.

Os traballadores con contratos temporais caeron case un 20%, cunha taxa de temporalidade do sector situándose no 19,6%. Os contratos indefinidos aumentaron un 18%, supoñendo un 80,4% do total. No caso dos autónomos, o número descendeu un 6%, chegando a sumar 482.000.

Neste trimestre, as principais actividades turísticas experimentaron un crecemento: a hostalaría aumentou nun 7,1%, as axencias de viaxe tiveron unha variación interanual do 0,4%, mentres que o transporte de viaxeiros foi do 10,8%.