Clúster

O presidente do Clúster Turismo de Galicia participou hoxe na presentación do selo “S de Sustentabilidade”, impulsado polo Instituto para a Calidade Turística de España.

Consolidar Galicia como un destino seguro, intelixente e sustentable desde o punto de vista ambiental, económico e social, é un dos obxectivos do Plan Director 2021-2023 Galicia Destino Seguro. Así o recordaba hoxe o presidente do Clúster Turismo de Galicia na presentación da “S” de Sustentabilidade, organizada polo Instituto para a Calidade Turística de España (ICTE), e na que participaron o seu director xeral, Fernando Fraile, e a directora da Axencia Turismo de Galicia, Nava Castro.

O novo selo do ICTE, presentado hoxe na Escola Galega de Administración Pública, ofrece ás empresas do sector turístico unha ferramenta para acadar a implantación dos Obxectivos de Desenvolvemento Sustentable (ODS). É o terceiro selo co que contará o ICTE tras a ‘Q’ de Calidade Turística e o certificado Safe Tourism, presentado no 2020.

Na súa intervención o presidente do Clúster Turismo sinalou que “a sustentabilidade é o eixo da estratexia turística para Galicia que compartimos desde o ámbito público e privado. É a única posible agora e no futuro, se queremos un futuro para o turismo”. Por iso subliñou que “o desenvolvemento sustentable é unha responsabilidade que todas as empresas temos que asumir ao formar parte da comunidade. É ademais un dos obxectivos de Desenvolvemento Sustentable da Axenda 2030 da ONU”.

Cesáreo Pardal destacou que a aposta de Galicia pola sustentabilidade non é recente “pero si que a estamos reforzando desde unha estreita colaboración público-privada con iniciativas como o Club de Produto Sustentable, no marco do convenio subscrito entre o Clúster e a Axencia Turismo de Galicia, ou a través dos diferentes Plans de Sustentabilidade en destino que está a desenvolver a Administración autonómica co apoio dos fondos Next Generation.”

O presidente do Clúster Turismo de Galicia sinalou a súa confianza en que este tipo de iniciativas contribúan a que Galicia sume ‘S’ de Sustentabilidade así como na capacidade das empresas, que xa demostraron como o seu esforzo pola calidade tivo recompensa. De feito, Galicia é  a segunda comunidade con máis selos Q na clasificación estatal superando os 300 e a primeira en incrementar o número de Q recibidas o último ano. Unha calidade e un esforzo que permitiron o ano pasado situar á comunidade nos postos de cabeza da recuperación do turismo en toda España, con algo máis de 4,2 millóns de viaxeiros aloxados e preto de 9 millóns de noites no conxunto de aloxamento regulados, ademais de 180.000 Compostelas, 40.000 máis das esperadas para pechar o Camiño de Santiago en 2021.