Clúster

A posibilidade de desconectar do estrés e a rutina diarios, entre os principais motivos para elixir destino tras a pandemia en 2022. 

O último informe levado a cabo pola compañía Booking a finais de 2021 desvela que, tras a pandemia, un 56% dos viaxeiros aposta por viaxar de forma sostible no futuro. Isto inclúe como factor decisorio á hora de elixir opcións que permitan desconectar do estrés e a rutina diarios. Non en balde, en 2019 o burnout ou estado de esgotamento mental e físico constante producido pola sobrecarga de tarefas diarias, foi recoñecido oficialmente pola Organización Mundial da Saúde.

Este cambio cara a novas maneiras de concibir a vida e, por conseguinte, das eleccións á hora de viaxar, está a levar a algúns empresarios hostaleiros a deseñar ofertas aliñadas co viaxar consciente, unha tendencia para ter en conta nos próximos anos.

Enclaves singulares, respecto á contorna a través dunha construción sostible, ou o deseño de experiencias idílicas que permitan ao viaxeiro escapar da rutina, son os puntos coincidentes nestas propostas que converten a desconexión no novo indicador de turismo de luxo.

O Hotel Atmos abriu as súas portas en 2021 co obxectivo de crear un espazo no que deixar fluír os sentidos a través dun singular deseño vangardista aberto á contorna natural onde se sitúa, a Serra de Outes, convertendo a a tranquilidade da zona e o contacto coa natureza nos seus principais focos de atracción. Aposta pola arquitectura sostible e un xiro ao concepto de turismo de luxo como sinónimo de desconexión e vivir experiencias.

Desde Silleda, Casa Cacheiro leva máis de 25 anos facendo das sensacións de paz e benestar os seus sinais de identidade. Rodeados dun enclave natural repleto de zonas verdes, fervenzas naturais e praias fluviais no corazón da comarca do Deza, neste aloxamento rural dan moito valor á contorna que lles rodea como facilitador de momentos de relax. Posúen o Certificado Q de Calidade Turística e o selo Galicia Calidade, e son lugar de referencia para quen busca no turismo rural tempo de desconexión de calidade.

No Hotel & Talaso  Louxo La Toja, os tratamentos con auga mariña e de Talasoterapia convertéronos en opción predilecta para quen visita as Rías Baixas con intención de escapar do estrés. E faino, ademais, cun forte compromiso coa sustentabilidade. Son posuidores do Selo Ecostars, certificado globalmente recoñecido que mide o impacto ambiental dos aloxamentos.