Clúster

A nova edición do salón internacional celébrase do 3 ao 7 de novembro e está centrada nos sabores das distintas rutas do Camiño de Santiago.

A gastronomía das distintas rutas de peregrinación a Compostela será un dos principais fíos condutores de Xantar, a nova edición do salón internacional que cada ano converte Ourense na capital do turismo gastronómico. Do 3 ao 7 de novembro os focos do sector volverán apuntar cara á cidade das Burgas para estar atentos a un certame cuxa 22 edición quere servir de punto de encontro para os profesionais da  enogastronomía, a hostalería e o turismo de toda a Península Ibérica. Para logralo, os seus organizadores elaboraron un amplo programa de actividades no que non faltarán os workshops entre empresas do sector, as conferencias, os talleres gastronómicos, as aulas de cata e as degustacións, as exposicións e presentacións, os encontros de blogueiros e confrarías gastronómicas, e os concursos e premios.

Os destinos enogastronómicos, os produtos agroalimentarios de calidade, as festas gastronómicas e as celebracións de contido histórico, as denominacións de orixe, os produtos gourmet, a arte gastronómica, os servizos para hostalería e os viños e bebidas de calidade son os principais sectores representados en Xantar, unha feira promovida por Expourense co patrocinio da Xunta, o Concello e a Deputación de Ourense, e en cuxa organización colabora tamén o Clúster Turismo de Galicia como membro do Comité Asesor.

Xantar estrea este ano unha nova data ao trasladarse no calendario do mes de febreiro ao de novembro ligándose así a unha época na que a gastronomía cobra especial relevancia na cidade de Ourense coa celebración do San Martiño e os magostos. A nova situación xerada pola pandemia obrigou a realizar axustes no programa, pero os seus promotores esperan repetir o éxito das edicións precedentes. Na máis recente, a do 2020, foron ao redor de 25.000 persoas as que pasaron polo recinto de Expourense para coñecer as propostas dos seus case 300 expositores e participar nas 150 actividades programadas. Este ano, Xantar aspira de novo a conquistar o favor de público e dos profesionais do sector e facer que o seu paso pola feira les deixe un inmellorable sabor de boca.