Clúster

A Casa- Torre da Tinería, en Lugo, coñecida tamén como o antigo hospital de San Miguel e propiedade da Xunta, pasará a ser un centro de promoción do turismo enogastronómico da provincia de Lugo. Así o anunciaron os titulares dos departamentos de Cultura e Turismo e Medio Ambiente, Román Rodríguez e Anxos Vázquez, durante unha visita ao lugar durante a cal tamén se anunciou que a licitación para as obras se producirá durante o verán. Román Rodríguez puntualizou que, tras a súa restauración, o inmoble será cedido á Asociación de Empresarios de Hostalaría e Turismo, APEHL, que instalará nel as súas dependencias administrativas, o que traerá consigo “un importante aforro de recursos para a entidade”.

Ademais, o edificio contará con aulas multiusos para a formación e a realización de actividades e disporá dun punto de información para os visitantes centrado na gastronomía e o turismo lucense. O titular de Cultura e Turismo sinalou que esta actuación suporá tamén a “rehabilitación dun inmoble singular, dos máis antigos de Lugo”, que pertence a unha tipoloxía hoxe extinta, casa-Torre, de orixe tardomedieval.

Este proxecto avanza, ademais, no obxectivo de dinamizar o Barrio da Tinería e acompáñase coas obras de urbanización da UI-8, coa que se creará unha praza que dará acceso público ao Pazo de Dona Urraca, xa que actualmente non está conectado coas rúas da contorna.