Clúster

• O recoñecemento reforza o compromiso do destino cun modelo sostible e baseado na excelencia

Un total de 34 establecementos e servizos turísticos do GDR Terras de Compostela recibiron o distintivo do Sistema Integral de Calidade Turística Española en Destino (SICTED), nun acto celebrado no Hotel Congreso de Teo. A entrega de diplomas contou coa participación do presidente do Clúster Turismo de Galicia, Cesáreo Pardal, xunto ao director de Axencia Turismo de Galicia, Xosé Manuel Merelles, a presidenta do GDR Terras de Compostela, Guarina Rey, e a alcaldesa de Teo, Lucía Calvo.

• Unha comarca que aposta pola calidade e a cooperación

A iniciativa, impulsada polo GDR Terras de Compostela desde 2019, busca consolidar a comarca como un referente de turismo sostible e de calidade, ofrecendo servizos profesionais e comprometidos coa mellora continua. Con estas novas adhesións, son xa preto de setenta os establecementos certificados.

Durante o acto, Cesáreo Pardal subliñou o compromiso que o sector mantén coa calidade e excelencia turística, mentres que Xosé Manuel Merelles valorou o papel da calidade como ferramenta clave para diferenciar Galicia nun contexto de turismo cada vez máis esixente.

Guarina Rey, pola súa banda, lembrou que Terras de Compostela foi o primeiro grupo de desenvolvemento rural da provincia da Coruña en impulsar o programa SICTED e destacou o valor desta certificación como símbolo de confianza para visitantes e residentes.