Clúster

Con nove recintos Galicia convértese no territorio que concentra maior número de espazos incluídos na rede.

O inmenso e espectacular patrimonio floral que atesoura Galicia segue sumando recoñecementos e consolidando esta terra como un destino imprescindible para os amantes do turismo de xardíns. A asemblea xeral do Itinerario Europeo de Xardíns Históricos celebrada o pasado día 6 en Lloret de Mar serviu para facer oficial a incorporación a este organismo de nove recintos situados en Galicia, o que converte á comunidade no territorio europeo con maior concentración de espazos incluídos na rede.

Seis dos nove xardíns que estrean este recoñecemento atópanse na provincia de Pontevedra: os situados nos pazos de Oca(A Estrada), Quinteiro da Cruz (Ribadumia); Quiñones de León (Vigo), Lourizán (Pontevedra) e Rubianes (Vilagarcía de Arousa), ademais do Castelo de Soutomaior. Os tres restantes están situados na provincia dá Coruña: os pazos de Santa Cruz (Vedra) e Mariñán (Bergondo), e a Alameda de Santiago de Compostela.

Todos eles están unidos polo denominador común da camelia, flor chegada a Galicia a finais do século XVIII procedente de países como China e Xapón, e que atopou nesta terra as condicións ideais para converterse nun elemento crave da ornamentación de pazos, casas  señoriales, parques e outros xardíns.

Coa súa incorporación ao Itinerario Europeo de Xardíns Históricos, os nove xardíns galegos poderán beneficiarse de maior visibilidade no ámbito internacional, de programas de formación e dun mellor posicionamento para optar a fondos europeos.

Desde a Xunta explican que o acto celebrado en Lloret de Mar serviu para facer oficial un acordo adoptado a finais do ano pasado. Ademais, durante esa xornada o Itinerario Europeo de Xardíns Históricos recibiu o diploma que acredita a súa condición de Itinerario Cultural do Consello Europeo, paraugas baixo o cal pasan a situarse tamén os nove xardíns galegos. “A certificación do Consello de Europa é unha garantía de excelencia que permite a estes roteiros promover a súa internacionalización e impulsar un turismo de alto valor. Ata o de agora o Itinerario contaba con 31 xardíns situados en oito países: Xeorxia, Alemaña, Hungría, Grecia, Italia, Polonia, Portugal e España”, destacan os responsables do Goberno autonómico.