Clúster

• Medio millón de viaxeiros aloxáronse en establecementos hostaleiros.

Galicia consolídase coma un destino turístico atractivo máis alá dos meses de verán. Segundo os últimos datos do Instituto Nacional de Estatística (INE), a comunidade rexistrou en outubro un crecemento do 4,8% en pernoitas e do 5,6% no número de viaxeiros aloxados en establecementos hostaleiros, cifras superiores á media nacional, que foi do 4,7% e 3,7%, respectivamente.

O décimo mes do ano pechouse con 510.524 viaxeiros aloxados en hoteis galegos, marcando o mellor outubro dos últimos 11 anos. Este aumento traduciuse en 923.058 noites contratadas, un fito que reforza a desestacionalización do destino.

O crecemento da demanda turística veu acompañado dun aumento do 2,5% na oferta de prazas hostaleiras, o que evidencia un sector en expansión. Este dinamismo beneficiou especialmente ao turismo internacional, que experimentou un notable repunte: as pernoitas de turistas estranxeiros medraron un 13,2% e o número de viaxeiros internacionais subiu un 13,4%. En outubro, estes visitantes representaron o 34% do total, consolidando Galicia como un destino cada vez máis atractivo para mercados internacionais.

Turismo interno e rendibilidade hostaleira

O turismo interno, protagonizado polos residentes de Galicia, tamén mostrou resultados positivos, cun crecemento do 4,2% en noites de hotel e do 2,6% en viaxeiros aloxados. Este impulso conxunto de turistas nacionais e internacionais contribuíu a mellorar a rendibilidade hostaleira, que nos primeiros dez meses do ano subiu un 7%.

O sector hostaleiro galego xerou neste período uns ingresos nominais totais superiores aos 390 millóns de euros, subliñando a importancia económica do turismo para a comunidade.

Un modelo turístico en evolución

Os resultados reflicten o éxito da estratexia pola que o Clúster leva apostando ano tras ano, co obxectivo de desestacionalizar a actividade turística en Galicia, ampliando a tempada alta. A aposta por unha oferta sostible e adaptada a diferentes públicos permite a Galicia manter o seu atractivo en calquera época do ano, reforzando a súa posición como un referente turístico en España.