Clúster

Un total de 54 establecementos foron distinguidos pola popular publicación durante o acto celebrado na Coruña.

O restaurante Paprica e o ArteSana Gastrobar gañaron os premios do xurado e do público no certame Showcooking que tivo lugar en Santiago de Compostela.

Cesáreo Pardal representou ao Clúster Turismo de Galicia nas dúas convocatorias.

O sector galego da restauración volveu mostrar músculo e presumir de talento na dúas convocatoria celebradas en días pasados en Santiago de Compostela e A Coruña e nas que o Clúster Turismo de Galicia participou tamén de forma activa representado polo presidente, Cesáreo Pardal.

A primeira das dúas citas tivo lugar en Santiago de Compostela o martes 21 por iniciativa da Axencia Turismo de Galicia, que reuniu a sete cociñeiros en representación das sete cidades galegas para competir polo galardón ao mellor petisco. Sheila Martínez do restaurante Roots (A Coruña) con “Guioza de chocos na súa tinta”; Álex M. Bacelo e Mar Lago de BaceLo (Ferrol) con “bocado de aldea”; Beatriz Alcalá de La Zapatería del Abuelo (Ourense) con “CANTA Castaña”; Ana Vilar da Cervexaría Leria (Vigo) con “Xema na Fraga”; Rubén González de El Cafetín (Pontevedra) con “Vacalao Do cru ao cocinao”; Álvaro Villasante do Paprica (Lugo) con “Bonito, morrón, cebola e paixón” e Álvaro Pérez de ArteSana Gastrobar (Santiago de Compostela) con “Queixo” foron os sete finalistas da sétima Gala Showcooking de Tapas por Galicia, na que Cesáreo Pardal formou parte do xurado profesional encargado de saborear e valorar cada unha desas preparacións.

O premio do xurado deste igualado e delicioso certame foi para Álvaro Villasante, do Paprica, mentres que o público se decantou polo bocado preparado por Álvaro Pérez, de ArteSana Gastrobar.

Un día despois, o mércores 22, A Coruña acolleu un acto organizado para entregar as súas placas identificativas aos restaurantes recomendados na última edición da Guía Michelin. 32 establecementos da Coruña, 5 de Lugo, 1 de Ourense e 16 de Pontevedra foron recoñecidos durante a gala patrocinada por Royal Bliss, a gama de mixers premium de Coca-Cola Europacific Partners Iberia, e na que o presidente do Clúster, Cesáreo Pardal, tomou a palabra para reivindicar a importancia da hostalería e do sector turístico en xeral.

Tamén participou no acto o cociñeiro Pepe Vieira, que acaba de recibir a súa segunda estrela Michelin e que colabora co Clúster a través de iniciativas como o Club de Produto Galicia Destino Sostible. Así mesmo, Jesús Picallo, vicepresidente do Clúster, subiu ao escenario para recoller a distinción entregada a un dos seus establecementos, o restaurante O Semáforo, integrado no hotel fisterrán que forma parte tamén de Galicia Destino Sostible.