A semana pasada o Clúster de Turismo e Turismo de Galicia iniciaron as dúas primeiras mesas de traballo das 20 previstas para elaborar un diagnóstico do sector turístico en Galicia. Estas xornadas, na que están convocados axentes do sector, son o punto de partida dun proceso participativo para coñecer de primeira man as necesidades e demandas do sector. Coa información recompilada elaborarase un diagnóstico que servirá de base para deseñar a planificación turística dos vindeiros anos.
A iniciativa, froito da colaboración entre Clúster e a Axencia de Turismo, busca a máxima participación de todos os axentes do ecosistema turístico. Trala celebración das dúas primeiras xornadas de trabalo na Casa da Cultura de Cee e no NH Collection A Coruña Finisterre da Coruña, as sesións participativas visitarán a rexión do Salnés, Baiona, Salvaterra de Miño, Lugo, Ourense, Ribadeo, Lalín, Monforte de Lemos, Sarria, Sanxenxo, Ferrol, Porto do Son, Pontevedra, Abegondo, A Rúa, Monterrei, Allariz e Santiago de Compostela.
En paralelo a esta convocatoria, lanzouse un cuestionario en liña para dar cabida a todos os profesionais deste ámbito que queiran participar. O obxectivo é recoller información sobre a diversidade de perspectivas e desafíos que enfronta o turismo nas diferentes zonas da comunidade.
Toda a información sobre o proceso para o diagnóstico está dispoñible no portal https://diagnoseturismo.gal/ e os interesados en participar nalgunha das mesas pode inscribirse a través do apartado participa.
Elaborando o diagnóstico
Ademais, en colaboración coas tres universidades galegas, elaborarase unha análise científica sobre a oferta, a demanda e a cadea de valor do sector turístico en Galicia, analizando polo miúdo os recursos que constitúen parte da súa oferta diferencial. Esta análise abordará tamén a evolución cualitativa e cuantitativa do sector no período 2016-2023.
Turismo de Galicia e o Clúster de Turismo buscan con este estudo coñecer a foto actual do sector nun momento marcado polos cambios nos hábitos dos turistas, con tendencias marcadas pola sustentabilidade e a dixitalización. Estas cuestións abordaranse no diagnóstico xunto con outros tres aspectos clave: a oferta, analizando polo miúdo os recursos de Galicia que constitúen parte da súa oferta diferencial; a demanda, co obxectivo de coñecer a súa evolución nos últimos exercicios; e a cadea de valor turística de Galicia, delimitando o sector turístico desde un punto de vista empresarial.