Clúster

• Os festivais confórmanse como un eixo estratéxico nas súas áreas de influencia, desde o punto de vista social, económico e turístico.

Galicia consolidouse nos últimos anos como un destino cultural destacado pola celebración de festivais musicais, tanto de gran formato como máis pequenos e especializados. En 2022 e 2023, máis de 2 millóns de persoas asistiron a festivais e concertos patrocinados pola Xunta de Galicia. Entre estes eventos, O Son do Camiño destaca por ser pioneiro, o que lle permitiu consolidarse entre as grandes citas do panorama festivaleiro español.

O cartel ecléctico de O Son do Camiño, que este ano incluíu a Green Day coma un dos artistas principais, xunto coas características do recinto (o Monte do Gozo) e a oferta complementaria de servizos, fixeron deste festival unha cita ineludible para mozas e non tan novas. Este ano, o festival atraeu a asistentes de máis de 15 países diferentes, reflectindo a súa dimensión internacional.

Para Xosé Merelles, director de Turismo de Galicia, a “alianza estratéxica” entre o sector musical e o turismo reflíctese á perfección en O Son do Camiño, que atraeu a unhas 40.000 persoas diarias e encheu planta hostaleira de Compostela e de gran parte da comarca. Merelles destaca o impacto turístico da industria musical en Galicia, citando un estudo da Asociación Galega de Empresas Musicais e a Universidade de Santiago (USC), que estima un impacto global de máis de 227 millóns de euros e 3.250 empregos. A asistencia a estes eventos xera unha demanda significativa en servizos de aloxamento e transporte, aumentando a produción en máis de 60 millóns de euros.

Kin Martínez, de Esmerarte Industrias Creativas, sinalou que cada asistente a O Son do Camiño gastaría unha media de 400 euros, beneficiando non só ao festival, que crea 4.000 postos de traballo directos e indirectos, senón tamén á hostalería, aloxamento, transporte e comercio local.