Clúster

A enquisa de perspectivas turísticas de Exceltur prevé que o turismo galego volva durante o 2022 ás cifras de negocio previas á pandemia.

A boa evolución que o sector turístico galego experimentou durante o 2021 situándose 22 puntos por riba da media nacional en canto a recuperación da demanda previa á pandemia da covid terá continuidade durante o 2022. Así se desprende do informe de conxuntura turística no que Exceltur fai a súa valoración do exercicio 2021 e expón as perspectivas para o ano que acaba de empezar.

Segundo o documento feito público en días pasados, Galicia situouse o ano pasado na segunda posición do ranking por autonomías cunha facturación do sector turístico un 18,7 % inferior ao ano 2019, sendo Asturias a única comunidade cuxo porcentaxe de caída foi inferior (17,1 %). Comunidades como Madrid e Cataluña situáronse con descensos da facturación superiores ao 50 %. Para este 2022, a previsión é que o sector turístico galego mellore esas cifras ata situarse a só unhas décimas (-0,3 %) da facturación rexistrada durante aquel 2019 previo á covid.

Castela e León (-2 %), Estremadura (-2,8 %), Navarra (-3,5 %), Asturias (-4,9 %) e Cantabria (-7,3 %) seguen a Galicia no ranking previsto para o 2022, que os responsables do informe de Exceltur atribúen á mellor resposta da demanda interna nos destinos de interior e do norte de España. O impulso engadido que supón a continuación do Ano Santo Xacobeo 21-22 é o que permitirá a Galicia dar un novo paso adiante ata situarse durante na primeira posición do ranking de recuperación da demanda.

O informe mostra como o 51,2 % dos empresarios turísticos galegos enquisados espera que esa recuperación do volume de facturación previo á pandemia se produza durante o terceiro trimestre deste ano. Un 4,3 % son máis optimistas e sitúana no segundo trimestre, mentres que para o 21,7 % haberá que esperar ao segundo semestre do 2023 para volver ás cifras do 2019 e para o 17,4 % ese horizonte está mesmo máis lonxe: no ano 2024. Por contra, no caso do conxunto do empresariado turístico español só o 30,4 % dos enquisados calculan que a recuperación se producirá xa no terceiro trimestre deste ano, mentres que un 16,7 % atrásana ao cuarto trimestre e un 41,9 %, ao longo do 2023.