Clúster

• Supéranse as previsións iniciais con estancias medias de 4 noites e unha afluencia de turistas internacionais de máis do 21%
• Son datos do Sistema de Monitorizacion e Análise de Datos de Aloxamento (SIMADA), que consulta os sistemas de aloxamentos galegos adheridos

Galicia pechou a Semana Santa cunha ocupación media de luns a domingo próxima ao 58%, unha porcentaxe que se elevou ao 77%, 74% e 78% nas xornadas do xoves, venres e sábado, respectivamente. Un balance positivo, tendo en conta a mala situación  meterorolóxica que viviu Galicia nos últimos días.

Segundo os datos da aplicación SIMADA (Sistema de Monitorización e Análise de Datos de Aloxamento), que vén de poñer na marcha o Clúster de Turismo de Galicia, a estancia media foi de catro noites, unha por riba do que apuntaban previsións iniciais. O perfil de turista foi principalmente nacional (preto 78%) e a porcentaxe maioritaria corresponde a o turismo interior, seguido do procedente de Madrid e, xa a máis distancia, de Castilla León, Andalucía e Asturias.

A afluencia de turistas internacionais superou o 21% fronte ao 8% que indicaban as reservas de principios de semana, canda aínda había unha ampla porcentaxe que non tiña asignada a procedencia. Portugal, Estados Unidos e Alemaña, son os países de orixe maioritaria destes turistas.

En ao prezo por noite, a media de todos os aloxamentos situouse finalmente en  70,85 euros de fronte aos 74 previstos.  Dadas as malas condicións climáticas hai aloxamentos que optan por reducir prezos para manter ou incrementar a ocupación.

SIMADA

Estes datos proceden de SIMADA, unha ferramenta para a monitorización e análise de datos de ocupación, previsión, prezos, entre outros, que o Clúster Turismo de Galicia pon a disposición das empresas de aloxamento de xeito gratuíto co obxectivo de facilitar a toma de decisións e ser máis competitivos. Entre outras vantaxes, a aplicación permite adoptar decisións sobre o prezo por habitación ou a aplicación de descontos; ofrece datos sobre o tipo de viaxeiro que nos visita para poder establecer estratexias comunicativas o máis axustadas a ese perfil; facilita información sobre o grao de ocupación e todo garantindo a confidencialidade dos datos achegados á plataforma.