[:gl]Novas[:es]Noticias[:en]News[:]

A feira dedicada aos produtos ecolóxicos e o ecoturismo celebrarase do 3 ao 5 de marzo en EXPOCoruña.

O prazo de inscrición dos expositores estará aberto ata o 26 de febreiro.

O Clúster colabora de novo neste encontro no que o ecoturismo xogará un papel destacado.

A Coruña acollerá o próximo mes de marzo unha nova edición de BioCultura, a feira de produtos ecolóxicos e ecoturismo que se celebra en seis cidades españolas de forma periódica (anualmente en Madrid e Barcelona, e cada dous anos en Sevilla, Bilbao, Valencia e A Coruña) reunindo a produtores, distribuidores, profesionais e consumidores para mostrar as últimas novidades.

No caso coruñés, a cuarta edición de BioCultura terá lugar nas instalacións de EXPOCoruña os días 3, 4 e 5 de marzo, e alí daranse cita máis de 200 expositores de ámbitos como a alimentación bio, o ecoturismo, a cosmética ecolóxica, a moda sostible, o fogar san, o benestar, os estilos de vida eco, a artesanía e as oenegués. Ademais, están previstas máis 150 actividades para completar a oferta que se poñerá ao alcance do público co obxectivo de superar a cifra de 14.000 visitantes.

A directora de eventos de EXPOCoruña, Pilar López Cordal, destacou a importancia crecente que o ecoturismo ten en BioCultura, sector que cualificou como “un dos máis destacados da edición deste ano” e resaltou tamén o apoio que a feira recibiu por parte das diversas institucións e entidades involucradas neste ámbito: “Deputación da Coruña, Consorcio de Turismo da Coruña, Clúster Turismo Galicia, Xunta, CRAEGA, Concello da Coruña, Reserva da Biosfera Mariñas Coruñesas… Todas estas institucións non tiveron dúbidas á hora de apoiar esta nova edición que pon o acento, de novo, no ecoturismo. Todas estas institucións participarán na feira, dando valor ás empresas e entidades do sector e mostrando a súa actividade turística e ambiental, ligada ao territorio como fonte de vida e economía de presente e futuro”.