Clúster

• No evento de presentación, que acolleu o parador de Baiona, participou o presidente do Clúster de Turismo de Galicia, Cesáreo Pardal.
• Galicia, preparada para tempada estival cunha campaña turística que sinala a Comunidade como destino de referencia.

Este martes, 20 de xuño, o parador de Baiona acolleu a presentación da nova campaña turística da Axencia Turismo de Galicia, titulada ‘Galicia senta ben’. No evento participaron o presidente da Xunta de Galicia, Alfonso Rueda Valenzuela, o alcalde do Concello de Baiona, Jesús Vázquez Almuiña, a delegada territorial da Xunta de Galicia en Viño, Ana Ortiz Álvarez, e o presidente do Clúster de Turismo de Galicia, Cesáreo Pardal.

Durante a súa intervención, o presidente do Clúster destacou que só nos primeiros meses deste 2023 máis de 1,2 millóns de persoas elixiron Galicia, preto dun 20% máis que o ano anterior. “Os que nos visiten este verán poderán corroborar que ‘Galicia senta ben’, afirmou Pardal, engadindo que o galego é un “territorio bendicido pola natureza que temos a sorte de desfrutar e o compromiso de coidar, porque temos un patrimonio histórico, cultural, arquitectónico e gastronómico que conforma o noso sinal de identidade”.

A campaña turística, que estará activa ao longo dos vindeiros meses, ten por obxectivo promocionar os espazos naturais, os urbanos e os establecementos hostaleiros das catro provincias galegas. Nos últimos anos Galicia consolidou as súas posibilidades turísticas en diferentes áreas coma o turismo termal, rural, náutico, de congresos, gastronómico, etnolóxico e cultural, sendo referencia en moitas desas tipoloxías.

No que vai de 2023 a Oficina do Peregrino xa rexistrou máis de 155.000 camiñantes. Este ano a Xunta de Galicia anunciou a posta en marcha do programa Xacobeo Xove, unha iniciativa que ofrecerá descontos adquiridos a través das axencias de viaxe adheridas ao programa. O Clúster de Turismo é unha das entidades colaboradoras no convenio a través do cal se lanza a iniciativa, que busca fomentar os camiños como experiencia turística entre a xuventude.