Clúster

• A iniciativa busca atraer ao visitante portugués e reforzar o turismo enogastronómico fóra de tempada

A gastronomía galega cruzou a fronteira a semana pasada coa inauguración en Porto da Semana Gastronómica “De Tapas por Galicia”, unha acción promovida pola Xunta de Galicia para captar turismo portugués e poñer en valor a oferta culinaria galega en formato de tapa.

O acto de presentación tivo lugar no emblemático Mercado do Bolhão, un dos espazos máis representativos da cidade, e contou coa participación do presidente do Clúster Turismo de Galicia, Cesáreo Pardal, e do director de Turismo de Galicia, Xosé Manuel Merelles.

Esta iniciativa busca reforzar a conexión entre Galicia e Portugal a través da gastronomía, unindo tradición, creatividade e produto local como motor para atraer visitantes, especialmente nos meses de outono.

• Sete chefs, sete sabores

Do 15 ao 25 de outubro, sete chefs galegos recoñecidos (participantes no certame Sete cidades, sete sabores) ofrecerán as súas creacións no Mercado do Bolhão, achegando a cociña galega ao público portugués a través de propostas de pequeno formato. Entre eles figura Álex Ferreiro, chef do restaurante O Sendeiro (Santiago de Compostela) e gañador da última edición do certame.

A acción complétase cunha caseta promocional de Turismo de Galicia, onde os asistentes poden informarse sobre a oferta turística galega e participar en sorteos e degustacións. Ademais, o espazo acolle a exposición fotográfica Galicia, así como a proxección de campañas audiovisuais que mostran a diversidade paisaxística, cultural e gastronómica da Comunidade.

Con esta proposta, Galicia reforza a súa presenza no mercado portugués e consolida a súa imaxe como destino enogastronómico de referencia no noroeste peninsular.