Clúster

• Un ano máis, o Clúster poñerá ao dispor dos asociados varias mesas nas que poderán manter reunións con operadores turísticos durante a Feira Internacional de Turismo.

Co inicio de 2025, regresa a Feira Internacional de Turismo (FITUR). Un ano máis, o Clúster Turismo de Galicia xestionará o espazo de negocios da caseta de Galicia na feira, no que poñerá ao dispor dos asociados 17 mesas (4 máis que na edición anterior), nas que poderán manter reunións con operadores turísticos.

Desde o Clúster habilitouse unha conta de correo electrónico (fitur@clusterturismogalicia.com) para a solicitude de reservas de data e hora para as mesas. Entre os datos a indicar: empresa, operador co que se vai a realizar a reunión, e número de persoas que asistirán á reunión. Para cada encontro estableceuse unha franxa de 30 minutos de duración.

Ademais, na propia feira, os asociados terán ao seu dispor unha persoa que se encargará da xestión destas citas e do control das mesas.

FITUR celebrarase do mércores 22 ao domingo 26 de xaneiro, en IFEMA Madrid. O acceso profesional será do 22 ao 24 de xaneiro, cun horario desde as dez da mañá ata as sete da tarde. O espazo de Galicia situarase no pavillón 9, parcelas 9C07/9C09.

Actualmente, os pases profesionais para unha xornada (22 €) e os pases profesionais permanentes (43 €) pódense adquirir con promoción por compra en liña a través da seguinte ligazón.