Clúster

En España hai 213 destinos adheridos a este proxecto que premia o compromiso coa calidade e 11 deles son galegos

O xeodestino Terras do Condado Paradanta, un dos 213 destinos españois que forman parte do Sistema Integrado de Calidade Turística SICTED, outorgou o distintivo a 24 establecementos turísticos nun evento que tivo lugar en Mondariz.

O distintivo SICTED premia o compromiso das empresas turísticas coa calidade e, neste momento, dun xeito especial, coa seguridade. Ten unha validez de dous anos, aínda que está suxeito a unha avaliación de seguimento anual, que certifica o cumprimento dos requisitos establecidos na metodoloxía da concesión.

O Sistema Integral de Calidade Turística Española dos Destinos é un proxecto promovido pola Secretaría de Estado de Turismo, co apoio da Federación Española de Municipios e Provincias. Recoñece o traballo dos establecementos pertencentes a 36 subsectores diferentes no campo do turismo.

En Galicia hai 11 destinos integrados no proxecto SICTED, que suman 711 entidades distinguidas.