Clúster

Cun 4,7 sobre 5, encabezan xunto cos do País Vasco o ranking elaborado polo portal clubrural.com.

O Barómetro do Turismo Rural do 2022 reflicte tamén que os aloxamentos galegos son lixeiramente máis baratos que a media nacional.

O portal especializado no ámbito do turismo rural clubrural.com acaba de facer pública a novena edición do seu Barómetro do Turismo Rural, un estudo no que se tivo en conta a 14.000 aloxamentos e 200.000 viaxeiros de toda España para realizar unha análise pormenorizada da situación deste sector, así como das súas “tendencias, ameazas e oportunidades”.

O dato máis significativo no que respecta a Galicia é que os aloxamentos deste tipo situados na comunidade son, xunto cos do País Vasco, os máis valorados de toda España. En ambos os casos, a clientela puntúaos cun 4,7 sobre 5, o que supón tres décimas máis que a nota media nacional (4,4), superando así a territorios con maior oferta e demanda de establecementos de turismo rural.

No caso da oferta, os aloxamentos situados en Galicia supoñen o 4,6 % do total nacional, moi por baixo doutros territorios como Castela e León (20,1 %), Andalucía (13,8 %), Cataluña (12,9 %), Castela-A Mancha (8,9 %) ou Asturias (7,8 %). En canto á demanda, a clasificación de destinos máis solicitados encabézaa Cataluña, cun 23,7 %, seguida de Castela e León (12,5 %) e Andalucía (11,7 %).

Con respecto aos prezos medios, algúns dos territorios con maior número de aloxamentos sitúanse na parte baixa da clasificación con cifras como os 27,5 euros por persoa e noite de Andalucía, os 27,6 euros de Castela e León ou os 29,8 euros, de Castela-A Mancha, mentres que Galicia, con 30 euros, queda máis preto da tarifa media nacional: 32 euros por persoa e noite.

O barómetro de Clubrural analiza, así mesmo, algunhas pautas e preferencias dos viaxeiros. O 41 % reservaron o seu aloxamento cunha antelación de entre 1 e 2 meses e os servizos ou aspectos que máis demandan son, por esta orde, que se trate dun aloxamento petfriendly (27,7 %), que estea habilitado para acudir con nenos (18,1 %), e que dispoña de piscina climatizada (14,2 %), piscina convencional (9,9 %), grella (8,8 %) e cheminea (8,7 %).