Clúster

• O evento, que se celebrará o 19 de decembro en Lalín, está dirixido ás empresas turísticas de receptivo que operan no territorio.
• O encontro pretende fomentar o coñecemento da oferta turística, especialmente as propostas máis innovadoras, entre os axentes turísticos galegos.

O vindeiro 19 de decembro, o Edificio Sociocultural Manuel Rivero en Lalín converterase no epicentro do turismo galego coa celebración do “Networking Rías Baixas: Turismo que une: Redes de traballo para a conformación de experiencias turísticas”. Este evento, organizado polo Clúster de Turismo de Galicia en colaboración coa Deputación de Pontevedra e Turismo de Galicia, busca fortalecer a comercialización do destino Galicia e ampliar a súa oferta turística a través do traballo conxunto entre as empresas do sector.

O encontro pretende fomentar o coñecemento da oferta turística, especialmente as propostas máis innovadoras, entre os axentes turísticos galegos. Deste xeito, as empresas de receptivo poderán incorporar estas actividades nas súas propostas de valor, contribuíndo a consolidar Galicia como un destino atractivo e competitivo.

Programación do evento

• Inicio: Ás 9:00 horas, cun relatorio sobre a conformación da oferta turística no territorio.
• Workshop: Sesión de dúas horas con formato de axendas personalizadas para facilitar contactos entre empresas.

O evento está dirixido a:

• Empresas de receptivo (compradores): 25 prazas dispoñibles, con prioridade ás AAVV maioristas de receptivo.
• Empresas vendedoras: Ata 25 establecementos de aloxamento (excluíndo vivendas de uso turístico) e ata 25 empresas de oferta complementaria. Darase prioridade ás empresas creadas nos últimos tres anos.

Inscricións

As empresas interesadas en participar deberán inscribirse antes do mércores 11 de decembro a través do seguinte formulario. Recoméndase proporcionar información completa e precisa, xa que será utilizada para confeccionar as axendas. A asistencia estará limitada a unha persoa por entidade para garantir unha xestión eficiente do evento.