Clúster

A iniciativa ‘Sete cidades, sete sabores’, organizada por Turismo de Galicia, percorre os sabores máis creativos da cociña galega para impulsar o turismo urbano fóra da tempada alta. O proxecto culminará o 1 de xullo cunha gala final na que se elixirá ao Mellor Cociñeiro de Tapas 2025, entre os chefs representantes das sete principais cidades galegas.

A través desta proposta, que combina gastronomía, cultura e promoción turística, Galicia conecta cun perfil de visitante que viaxa durante todo o ano, atraído por experiencias culinarias auténticas e de calidade. Ferrol, Lugo, Ourense, Vigo, Pontevedra, Santiago e A Coruña participan neste singular roteiro do sabor a través de elaboracións que reflicten a identidade e creatividade dos seus cociñeiros locais.

Cada cidade presenta unha tapa orixinal que competirá por dous galardóns: o premio do xurado profesional e o premio do xurado popular, que decidirán os asistentes da gala mediante televotación. Entre os membros do xurado profesional figuran referentes como o director do Centro Superior de Hostalería de Galicia, José Paz Gestoso, e representantes do ámbito gastronómico e dixital.

As propostas van desde reinterpretacións de produtos tradicionais, como o pastel de filloa con cabeza de bacallau de Ferrol (‘Os Polos Opostos’) ou o ‘Ravioli de chourizo ceboleiro’ da Coruña, ata creacións innovadoras como o ‘Petisco larpeiro’ de Lugo, ou a tapa ‘Ondas do mar’ de Vigo. Tamén destacan a proposta de Ourense, ‘Gamba na corte’, o ‘Tomatún’ de Pontevedra, e ‘Bonito, millo e lagostino’, a tapa compostelá. A sostibilidade, o arraigamento local e a creatividade son o fío condutor desta singular ruta de sabores polas sete cidades galegas.

Con esta iniciativa, Galicia non só busca promocionar a súa cociña como atractivo turístico, senón tamén reforzar o papel das súas cidades como destinos que combinan historia, modernidade e sabores que sorprenden.