Clúster

A data límite inicial era o 30 de setembro, pero foi prorrogada ata o 21 de outubro.

Os beneficiarios repartiranse 300.000 euros en axudas, que serán concedidas por orde de solicitude.

Boas novas para os responsables de axencias de viaxes (tanto maioristas como minoristas), aloxamentos, restaurantes e provedores de oferta turística complementaria que están interesados en beneficiarse do programa de patrocinios do Club de Produto Galicia Destino Sostible que impulsa o Clúster Turismo de Galicia coa colaboración da Xunta. O 30 de setembro era, inicialmente, a data límite para poder solicitar as axudas do Goberno autonómico, pero o elevado interese que espertou a iniciativa nos últimos días animou a ampliar ese prazo ata o 21 de outubro.

De feito, o número de empresas que forman parte do Club non deixa de aumentar e na última reunión do comité de avaliación foi aprobada a incorporación de 11 novos membros: Hotel Gran Proa, Hotel Casa Rosalía, Torres de Moreda, Restaurante Curricán (Galetabernas S.L.), Restaurante Pepe Vieira, Hotel Bienestar Moaña, Sailway, Hotel Mogay, Sacra Activa, Prado Tours (Galicia Trips & Esperiences) e Buscando el Norte. Así, o número de integrantes do Club de Produto Galicia Destino Sostible aproxímase xa ao medio centenar.

Para formar parte do Club de Produto Galicia Destino Sostible e poder beneficiarse do programa de patrocinios é necesario cumprir os requisitos establecidos. Aquelas empresas que teñan algunha certificación de sustentabilidade (S do ICTE, Biosphere, Green Key, EU Ecolabel, Green Globe21, Travellife, Rainforest Alliance Certified, Estrela Verde da Guía MICHELIN, etc.) ou ambiental (ISO 14000, EMAS, etc.) poderán adherirse directamente ao club. Os aspirantes que non teñan algunha desas certificacións deberán cumprir co 100% dos requisitos obrigatorios e, polo menos, o 33% dos considerados valorables.

Os interesados poden solicitar máis información a través do correo electrónico info@galiciadestinosostible.com ou do teléfono (+34) 881 50 51 02.