[:gl]Novas[:es]Noticias[:en]News[:]

Da man de Turismo de Galicia e por segundo ano consecutivo a Asociación Galicia Destino Golf levará a oferta galega especializada deste tipo de turismo deportivo ao certame Madrid Golf Experience, o encontro anual no que se darán cita a industria e os afeccionados a este deporte que terá lugar do 8 ao 10 de abril no Centro de Tecnificación da Federación de Madrid.

Turismo de Galicia contará cun recinto de 20 metros cadrados no que se informará das posibilidades da oferta galega ao público asistente, ademais de manter diferentes encontros de traballo con turoperadores especializados en turismo de golf que visitan esta feira cos que se tentará establecer relacións comerciais para mellorar a comercializiación do turismo de golf en Galicia. Ademais, no marco da celebración do evento desenvolverase tamén o torneo Senior por Parellas de Turgalicia. Así, Turismo de Galicia e Galicia Destino Golf colaborarán unha vez máis na difusión dos recursos e produtos vinculados ao turismo deportivo nos que non faltará a oferta turística xeral e o Camiño de Santiago.