A desconexión e o relax, o factor máis valorado á hora de planificar unha viaxe

O descubrimento de novos destinos, a calidade dos aloxamentos e o prezo completan a lista de prioridades segundo a última enquisa de ObservaTUR.

O estudo amosa diferenzas en función da idade e o sexo dos viaxeiros.

Cales son os factores que máis interveñen no turista á hora de planificar unha viaxe? A esta pregunta trata de dar resposta a enquisa realizada polo Observatorio Nacional do Turismo Emisor, ObservaTUR. E os resultados mostran que a gran maioría (7 de cada dez) citan a relaxación e a desconexión do traballo e a rutina, sendo este o principal factor para o 30 % deles. Séguenlle en importancia a procura de novos destinos (para un 20 %), a calidade dos aloxamentos (para o 13 %) e, xa en cuarta posición, o prezo da viaxe, que se sitúa tamén por diante de cuestións como a non masificación ou a proximidade.

O estudo elaborado por este observatorio integrado por Amadeus, AON, Beroni, Carrefour Viaxes, IAG7/Airmet, Iberia, ILUNION Hotels, MundiPlan, ReiniziaT e a Unión Nacional de Axencias de Viaxe (UNAV), amosa tamén que aínda que o aspecto da desconexión e o descanso encabeza as preferencias dos consultados sen distinción nin de idades nin de sexo, si hai diferenzas significativas en canto á importancia que lle conceden e tamén en como se sitúan no ranking as outros criterios máis citados.

Así, o relax é primordial para o 33 % dos homes, mentres que no caso das mulleres esa porcentaxe baixa 6 puntos. Si hai maior consenso en canto á importancia que dan á novidade do destino (o 18 % para eles e o 17 % para elas), pero as mulleres elevan a cuestión do prezo ao terceiro chanzo das súas preferencias (16 %) por diante da calidade do aloxamento (14 %), mentres que os homes valoran máis este último aspecto (13 %) que o apartado económico (10 %).

Por idades, o prezo é o terceiro factor máis citado polos mozos de entre 18 e 24 anos (18 %), pero a súa importancia redúcese a medida que aumenta a idade do viaxeiro: un 15 % para os de 35 a 49 anos, un 8 % para os de 50 a 64, e un 7 %, para os de 65 a 74 anos. Por contra, a calidade do aloxamento traza a curva inversa: é a preferencia principal para o 10 % dos mozos de 18 a 34 anos, crece ao 13 % para os dous seguintes segmentos de idade (35 a 49 e 50 a 64 anos) e dispárase ata o 24 % para os maiores de 65 anos.