Clúster

• Un compromiso coa sustentabilidade e a conservación patrimonial

Galicia anunciou a súa adhesión aos principios da Carta Internacional de ICOMOS para o Turismo Cultural Patrimonial 2022, converténdose en pioneira na súa aplicación en contornas rurais. O documento, de referencia internacional, sitúa a protección do patrimonio cultural no centro da planificación turística e promove un modelo sostible que integra conservación, participación comunitaria e acción climática.

O director de Turismo de Galicia, Xosé Merelles, mantivo un encontro con Celia Martínez Yáñez, vicepresidenta do Comité Científico Internacional de Turismo Cultural de ICOMOS e coordinadora da Carta, quen visitou a comunidade para analizar a súa implementación xunto a outros membros do comité.

• Patrimonio rural como motor de desenvolvemento

A adhesión reforza o compromiso galego cun turismo que combine identidade cultural e sustentabilidade, poñendo en valor destinos como a Ribeira Sacra, Os Ancares ou O Courel, así coma outros espazos do interior ourensán. Todos eles representan o tipo de territorios que a Carta quere destacar: lugares onde o turismo debe ser motor económico sen poñer en risco a autenticidade nin a contorna natural.

Con esta incorporación, Galicia busca consolidarse como un modelo replicable de turismo cultural sostible que poida inspirar a outros territorios de interior a nivel internacional.

• Os sete principios da Carta

1. Compromiso por situar a protección e conservación do patrimonio cultural no centro da planificación e xestión responsable do turismo cultural.
2. Xestionar o turismo nos lugares do patrimonio cultural a través de plans de xestión baseados na capacidade de acollida e outros instrumentos de planificación e vixilancia dos efectos do turismo.
3. Enriquecer a concienciación pública e a experiencia dos visitantes mediante unha interpretación e presentación sensibles do patrimonio cultural.
4. Recoñecer e reforzar os dereitos das comunidades residentes mediante o acceso e a gobernanza participativa.
5. Sensibilizar e reforzar a cooperación para a conservación do patrimonio cultural
6. Aumentar a resiliencia das comunidades e do patrimonio cultural.
7. Integrar a acción climática e as medidas de sustentabilidade na xestión do turismo cultural e o patrimonio cultural.