Clúster

• O sistema de monitorización de datos (SIMADA) ofrece datos de ocupación, prezos e canles de venda, o que permite a estes establecementos axustarse ás tendencias do mercado en tempo real.
• A plataforma está dispoñible para calquera empresa de aloxamento que ceda os seus datos, que se consultarán sempre de forma agregada e anónima, con todas as garantías de seguridade e confidencialidade.

O Clúster Turismo de Galicia (CTG) presentou en FITUR o Sistema de monitorización de datos de aloxamento, SIMADA, unha ferramenta gratuíta que ofrece información relevante, en tempo real, aos establecementos hostaleiros para que poidan optimizar as súas estratexias e mellorar a súa rendibilidade.

Durante a presentación, que contou coa participación do presidente da Xunta, Alfonso Rueda e do director da Axencia de Turismo, Xosé Manuel Merelles, o presidente do Clúster, Cesáreo Pardal, sinalou que o obxectivo de SIMADA “é mellorar a competitividade do sector, cuxa colaboración será esencial para que sexa exitoso”.

A plataforma ofrece ás empresas adheridas datos actualizados de ocupación, prezos e canles de venda, o que lles permite tomar decisións estratéxicas e axustarse ás tendencias do mercado en tempo real. A información procede, esencialmente, dos sistemas de xestión dos propios aloxamentos e compleméntase con datos de web scrapping de sitios relevantes de comercialización turística e información estatística do INE ou AENA.

SIMADA é sistema gratuíto ao que poderá acceder calquera empresa de aloxamento que ceda os seus datos, que se consultarán sempre de forma agregada e anónima, con todas as garantías de seguridade e confidencialidade. O acceso á información realízase a través dunha aplicación web accesible e sinxela, deseñada para que calquera usuario poida aproveitar ao máximo as súas funcionalidades sen necesidade de coñecementos técnicos avanzados.

Para o Clúster esta é unha iniciativa de calado polo seu impacto na rendibilidade empresarial, polo que incentivará a súa integración entre as empresas de aloxamento, valorando o seu uso en ordes de axuda ou na participación en workshops. Ademais, a implantación de SIMADA contará co apoio da Administración autonómica, a través dun convenio coa Axencia de Turismo.

A posta en marcha de SIMADA responde varios dos retos expostos na Estratexia de Turismo de Galicia 2030: incrementar a rendibilidade das empresas, impulsar a transformación dixital do sector e a colaboración empresarial para mellorar a gobernanza do destino.