Clúster

A previsión é que 2019 acabe cunha nova marca, alcanzando o 350 mil peregrinos

José Antonio Vázquez, un peregrino valisoletano que realizaba a Ruta Xacobea por segunda ocasión, con medio século de diferenza entre o primeiro e este segundo Camiño, foi o peregrino 300 mil nun ano en que previsiblemente se volverá a superar a marca de chegada de romeus, cunha previsión que se sitúa ao redor do 350 mil a finais de ano, procedentes de máis de 180 nacionalidades.

A chegada do peregrino 300 mil prodúcese, ademais,14 días antes que o ano pasado, o que tamén supón unha cifra histórica. O peregrino, José Antonio Vázquez, que percorreu o Camiño Francés desde León 50 anos despois de percorrelo por primeira vez, recibiu en Compostela unha Compostela especial de mans do deán da Catedral nun acto no que tamén participou o conselleiro de Cultura e Turismo, Román Rodríguez. Este último destacou o crecemento sustentable da Ruta e asegurou que “é cedo para facer balance porque aínda queda un trimestre, pero estamos seguros de que superaremos a cifra dos 327.000 do ano pasado”, e engadiu que o importante “non é o crecemento”, senón os valores que leva asociados e a riqueza sociocultural e económica que xera.

O conselleiro lembrou o carácter internacional e descentralizado do Camiño de Santiago, que está a experimentar un incremento de peregrinos nas súas diferentes rutas, unha peregrinaxe que ademais de ser “unha fonte de orgullo, é unha fonte de riqueza a todos os niveis para os 138 concellos polos que pasan e para toda Galicia”.