Clúster

• O evento reuniu a máis dun cento de representantes do ámbito educativo e empresarial para fortalecer a formación profesional en turismo, hostalería e industrias alimentarias.

O Centro Integrado de Formación Profesional Compostela acolleu a semana pasada un novo Encontro Sectorial do Plan Conecta FP Galicia, centrado nos sectores do turismo, a hostalería e as industrias alimentarias, coa participación de máis dun cento de persoas, entre representantes de empresas, equipos directivos e profesorado de centros formativos.

Durante a xornada, o presidente do Clúster Turismo de Galicia, Cesáreo Pardal, subliñou a necesidade de prestixiar as profesións turísticas e mellorar a percepción que a sociedade ten do sector: “Queremos visibilizar o papel dos profesionais, reforzar a súa importancia na cadea de valor e recoñecer o impacto real que teñen na economía e no desenvolvemento do territorio”, sinalou.

Xunto a el, participaron na inauguración o conselleiro de Educación, Ciencia, Universidades e Formación Profesional, Román Rodríguez González, o director de Turismo de Galicia, Xosé Manuel Merelles, e a directora xeral de FP Galicia, Eugenia Pérez.

O encontro serviu para analizar como mellorar a conexión entre a formación profesional e as necesidades reais do mercado laboral, nun contexto onde a demanda de persoal cualificado é crecente. En total, existen 196 programas formativos, ciclos e máster de FP, impartidos en 58 centros educativos. Actualmente, máis de 5.200 estudantes cursan ensinos de FP vinculadas a estes sectores, e algúns ciclos alcanzan índices de inserción laboral superior ao 93%, incluíndo titulacións con pleno emprego como Vitivinicultura, Termalismo e Benestar, e Xestión de aloxamentos turísticos.

Ao longo da xornada, desenvolvéronse relatorios e mesas redondas sobre acreditación de competencias, o papel da FP Dual Intensiva e a colaboración entre centros educativos e empresas. Participaron representantes de firmas como o Parador Costa da Morte, O Corte Inglés, Grupo HOTUSA, Gran Hotel Talaso Sanxenxo ou Café Venecia, ademais de responsables de centros como o CIFP Compostela e o CIFP Carlos Oroza.

Estes encontros sectoriais enmárcanse nunha estratexia de escoita activa e colaboración directa co tecido produtivo, funcionando como espazos de consulta ao sector para detectar necesidades reais e emerxentes. A través da participación de empresas, centros educativos e axentes clave, búscase definir unha oferta formativa actualizada, útil e aliñada coas competencias que demanda o mercado laboral, garantindo así unha FP máis conectada co presente e futuro do turismo, a hostalería e a industria alimentaria en Galicia.

Desde o Clúster destacouse a importancia de seguir traballando xuntos para xerar talento, dignificar as traxectorias profesionais no sector e consolidar Galicia como un destino de calidade tamén desde o seu capital humano.