Clúster

O acto serviu para presentar os proxectos cos que a Xunta opta a captar 28 millóns de euros de fondos da UE.

Fisterra foi a localidade escollida este luns pola Xunta para celebrar o Día Mundial do Turismo e presentar o programa de actuacións co que aspira a poñer en valor o modelo turístico autonómico e captar fondos europeos por un importe total de 28 millóns de euros. O acto celebrado no emblemático faro desa localidade da Costa da Morte estivo presidido polo vicepresidente primeiro da Xunta e conselleiro de Presidencia, Xustiza e Turismo, Alfonso Rueda, e contou coa participación da directora de Turismo de Galicia, Nava Castro; o alcalde fisterrán, José Marcote, e o presidente do Clúster Turismo de Galicia, Cesáreo  Pardal.

Rueda detallou que son seis as propostas de actuación que a Xunta presentará aos fondos europeos extraordinarios do Plan Territorial de Sustentabilidade Turística en Destinos e ao Plan Nacional Xacobeo 21-22. Con cargo ao primeiro deses plans, o Goberno autonómico pretende realizar actuacións de rehabilitación da fachada litoral (por valor de case 8 millóns de euros), de melloras da senda litoral (3,5 millóns) e de posta en marcha de infraestruturas náuticas e accións que potencien Galicia como destino náutico (3 millóns). Con respecto ao Plan Nacional Xacobeo 21-22, a Xunta aspira a destinar 3,5 millóns de euros a converter Galicia nun destino cicloturista a través das rutas xacobeas e a rede Eurovelo, revalorizar a ruta marítima fluvial do Mar de Arousa mediante un investimento de 3,2 millóns de euros, e poñer en valor o Camiño de Santiago como unha experiencia segura, innovadora e apta tamén para as familias, destinando a iso 6,5 millóns de euros.

O acto celebrado en Fisterra serviu tamén para destacar as boas cifras rexistradas polo sector turístico galego durante o mes de agosto, debido a que foi a única comunidade autónoma española que superou os rexistros prepandemia. Así, os datos de Galicia do pasado agosto con respecto ao mesmo mes do 2019 superan en 27 puntos a media nacional. Respecto diso, Cesáreo Pardal sinalou que eses bos datos “non son froito de calquera circunstancia, senón do traballo” e avogou por proseguir pola senda da colaboración público-privada na que o Clúster leva traballando en consenso coas distintas administracións desde fai case 10 anos. O presidente do Clúster incidiu tamén na necesidade de seguir mellorando a sustentabilidade e a formación do sector para continuar pola senda ascendente e lograr que o 2022 sexa un ano histórico en canto a actividade turística.

Nesa mesma liña, Alfonso Rueda sinalou que a seguridade, a calidade e a sustentabilidade son os eixos do Plan Director 2021-2023 Galicia Destino Seguro, elaborado pola Axencia Turismo de Galicia coa colaboración do Clúster Turismo de Galicia, e co que a comunidade aspira a alcanzar 5 millóns de visitantes no ano 2023.