Clúster

Os “fam trips” organizados en colaboración coa Axencia Turismo de Galicia desenvólvense en catro dos itinerarios das rutas de peregrinación.

Máis de medio centenar de axentes de viaxes de Galicia participan estes días nunha serie de viaxes de familiarización (“fam trips”) organizados pola Federación Galega de Turismo Rural por distintos puntos das rutas de peregrinación a Compostela. Esta iniciativa forma parte do convenio alcanzado por Fegatur coa Axencia Turismo de Galicia para promocionar o turismo rural galego no marco das celebracións do Xacobeo 21-22 dando a coñecer entre os profesionais do sector a oferta de aloxamentos rurais e experiencias que ofrece o Camiño de Santiago. No seu denvolvemento colaboran tamén a Asociación de Turoperadores Receptivos de Galicia (Atrega) e a Asociación Galega de Axencias de Viaxe (Agavi).

A intención destas viaxes é combinar as propostas de aloxamento e gastronomía en novos paquetes turísticos que serán comercializados polas axencias de viaxes durante o próximo ano e dar así continuidade á tempada verán outono do presente exercicio. Búscase tamén, segundo explican desde  Fegatur, “explorar novos públicos e novos territorios que buscan nos camiños de Santiago e na singularidade do rural galego un motivo para ao reencontro cun mesmo, así como coas paisaxes auténticas e co patrimonio natural e cultural particular”.

Os dous primeiros “fam trips” tiveron como escenario o Camiño de Inverno, con visitas a Quiroga, Vilachá, Monforte de Lemos, Belesar e Pantón, e o Camiño do Norte, con paradas en Foz, Barreiro, Lourenzá e Cervo.

As próximas citas serán na Vía da Prata e no Camiño de Fisterra e Muxía. No primeiro caso, a viaxe de familiarización desenvolverase do 30 de novembro ao 3 de decembro con visitas nos municipios da Estrada, Monterrei e Allariz. No caso do Camiño de Fisterra e Muxía, a actividade terá lugar en Outes e Muxía do 30 de novembro ao 2 de decembro.

Nos catro casos, o programa organizado por Fegatur inclúe “workshops” co obxectivo de establecer “sinerxías e contribuír á desestacionalización e diferenciación do turismo rural galego”. Os seus promotores esperan que estes intercambios sirvan tamén para revisar a imaxe de marca do turismo rural galego e abordar novas estratexias con vistas ao próximo ano.