Clúster

• A formación, de 1 hora de duración, está dispoñible ata o 31 de decembro de 2024.

A formación continua é unha ferramenta clave para a innovación e o crecemento sostible. Neste contexto, Turismo de Galicia lanza un curso centrado na creación de produtos turísticos sostibles e experienciais, aberto ata o 31 de decembro de 2024 para todos os interesados do sector.

Este curso, deseñado para ofrecer ferramentas prácticas e útiles aos profesionais do turismo, ten como obxectivo axudar ás empresas para mellorar a xestión e comercialización dos seus produtos. Cunha duración dunha hora, enfócase na transformación dixital e a sostibilidade, dúas áreas chave para o futuro do turismo.

O programa está dividido en varias seccións, comezando cunha introdución teórica, seguida da explicación dun canvas de produto que guía aos participantes na creación de produtos completos. Os temas inclúen desde a proposta de valor e segmentación de mercado ata a importancia de aliñar as iniciativas cos Obxectivos de Desenvolvemento Sostible (ODS). O curso tamén ofrece un caso práctico e modelos personalizables para axudar aos participantes a deseñar e posicionar os seus propios produtos.

A formación está dirixida a propietarios, directivos, consultores e outros profesionais do turismo que desexen mellorar os seus coñecementos en marketing e xestión sostible. O curso está impartido por Tirso Maldonado, consultor IT e socio director en Socialtec, con máis de 25 anos de experiencia no ámbito dixital e tecnolóxico.

As inscricións son ilimitadas, e os interesados poden rexistrarse a través do portal de Turismo de Galicia. Para máis información, poden contactar co departamento de formación de Turismo de Galicia a través do correo formacion.turismo@xunta.gal.

Oportunidades de formación con Turismo de Galicia

Ademais desta formación, Turismo de Galicia mantén abertas diferentes preinscricións para varias das súas teleformacións dirixidas ao sector, entre as que se atopan:

• Ciberseguridade na empresa
• Deseño do perfil do cliente
• Deseño da experiencia do cliente
• Fundamentos de marketing dixital
• Ciberseguridade e legalidade na contorna dixital
• Google Docs na ofimática de Google
• Disco duro virtual con Google Drive
• WhatsApp Business para o negocio turístico
• Fotografías co Smartphone, Snapseed e Google Fotos
• Crea a túa propia canle de Youtube paso a paso
• Estratexia e publicidade en Facebook
• Curso práctico no uso de TikTok
• Autodiagnose das empresas do sector turístico de Galicia

Todas as formacións pódense consultar a través da páxina web de Axencia Turismo de Galicia.