Clúster

A aceleradora de startups da Xunta rexistrou un 40 % máis de candidaturas que o ano pasado.

A segunda edición da aceleradora de startups turísticas Turislab posta en marcha pola Xunta espertou un gran interese entre os mozos emprendedores do sector. Así o demostra o feito de que o número de proxectos que aspiran a beneficiarse do apoio e impulso deste programa de formación e mentorización aumentase nun 41 % con respecto á edición do 2011 ata sumar un total de 117 candidatos nesta ocasión. “O labor desenvolvido desde que arrincou a iniciativa, hai agora un ano, e os primeiros casos de éxito protagonizados por startups xa aceleradas na primeira promoción de talento turístico innovador foron claves para mellorar os rexistros iniciais”, destacan desde a Xunta.

Agora chega o momento de realizar unha primeira selección entre eses 117 aspirantes e elixir ás 15 startups (máis outras 5 como suplentes) que formarán parte de primeiro módulo da Pre-Academia e que tras un período formativo realizarán unha presentación do seu proxecto para tratar de facerse con algunha das dez prazas da Fase Academia da Aceleradora.

O nome deses 15 preseleccionados farase público o 28 de marzo e tres días despois dará comezo a fase da Pre-Academia, que se prolongará ata o 6 de maio, xornada do Demoday na que deberán presentar as propostas coas que optarán a pasar á fase central da Aceleradora.

Do mesmo xeito que o ano pasado, os dez proxectos finalistas dispoñerán de 6 meses para dar forma e acelerar a súa iniciativa, e pugnarán polos premios finais, que están dotados cunha contía total de 80.000 euros. Tamén optarán a posibilidade de beneficiarse de accións de promoción e participación a feiras e outros eventos do sector da man da Axencia Turismo de Galicia.

Da selección dos mellores proxectos encargaranse os integrantes dun comité formado por destacados profesionais de diversos ámbitos do mundo do turismo e no que estará representado tamén o Clúster Turismo de Galicia.