Clúster

Case a metade dos turistas que chegan a Galicia sinala entre as actividades para realizar a visita a museos e monumentos.

As últimas cifras de visitantes dos museos que xestiona a Xunta achegan un novo motivo de optimismo para o mundo da cultura e do turismo. No primeiros catro meses do ano, pasaron por instalacións como o Centro Galego de Arte Contemporánea (Santiago de Compostela), o Museo do Mar de Galicia (Vigo) ou o Museo Arqueolóxico Provincial de Ourense un total de 103.000 persoas, o que supón un 15 % máis que durante o mesmo período do 2021 e permite recuperar os números de afluencia rexistrados no 2019, antes de la pandemia de la covid.

Estas cifras, feitas públicas polo conselleiro de Cultura, Educación, FP e Universidades, Román Rodríguez, no Museo de Arte Sacra de San Paio de Antealtares, en Santiago de Compostela, con motivo da celebración do Día Internacional dos Museos, vese referendada polos datos doutras institucións, como o Museo de Pontevedra, de titularidade provincial, que durante o primeiro trimestre deste ano recibiu a 16.000 visitantes, o que supón o mellor dato do últimos sete anos. Ademais, esa mesma institución pontevedresa sumou durante a pasada Semana Santa máis de 4.300 visitas, o segundo mellor resultado en seis anos.

A mellora das cifras é significativa tamén desde o punto de vista turístico, debido a que segundo os datos da Enquisa do Turismo en Destino en Galicia a visita a museos e monumentos é unha das actividades que realizan maioritariamente os visitantes que chegan a esta terra. Así o manifestan máis do 46 dos visitantes. Só a visita a lugares de interese turístico (75 %) e o turismo gastronómico (49,9 %) superan aos museos e monumentos nun ranking no que mesmo o goce das praias e o litoral sitúase por baixo (39,5 %).

Cabe lembrar que Galicia dispón de máis de 80 museos e coleccións visitables, de diferentes titularidades e tipoloxías (arqueoloxía, arte, casas-museo, ciencia, etnografía…), inscritos de forma oficial no Censo de Museos e Coleccións. A súa oferta compleméntase ademais coa que poñen ao alcance dos visitantes varias decenas de centros máis diseminados por toda a comunidade e destinados tamén á conservación e divulgación do patrimonio material e inmaterial.