[:gl]Novas[:es]Noticias[:en]News[:]

• Con esta nova incorporación, Galicia suma 10 festividades con este recoñecemento.

A Festa da Filloa de Lestedo vén de ser declarada Festa de Interese Turístico Nacional. Unha celebración que pon en valor un produto gastronómico con gran arraigamento e que combina con outras propostas culturais coma o Entroido dos Xenerais da Ulla. A Secretaría de Estado de Turismo destacou a importancia desta festa pola súa contribución á diversificación e á descentralización do turismo, xerando beneficios tanto para o territorio como para os seus residentes. Desde 2008, a de Lestedo tamén é Festa de Interese Turístico Rexional.

Esta celebración naceu froito do interese dos veciños e veciñas desta parroquia por poñer en valor un produto gastronómico con moito arraigamento. Organizada desde 2015 pola Asociación Cultural da Filloa de Lestedo, esta festa popular cumpriu este ano o seu 40 aniversario.

A Festa da Filloa de Lestedo obtivo a declaración como Festa de Interese Turístico Nacional (FITN) tras completar un exhaustivo informe técnico que confirma o cumprimento de todos os requisitos establecidos pola Secretaría de Estado de Turismo. Isto inclúe o respaldo unánime da Corporación Municipal á declaración do FITN, así como un informe favorable emitido pola Axencia Galicia de Turismo en apoio á súa candidatura.

Ademais, o informe técnico da Asociación Cultural da Filloa, en colaboración co Concello, examina diversos aspectos da celebración, que se iniciou en 1984. Profunda na súa orixe, o seu arraigamento cultural e a participación activa da comunidade no seu desenvolvemento. Tamén detalla as colaboracións establecidas con diversas entidades, tanto locais como supramunicipais, así como doutras índoles, que contribuíron a enriquecer a celebración e expandir a súa programación.

Coa Festa da Filloa de Lestedo xa son 10 as festividades galegas que contan coa declaración de Festa de Interese Turístico Nacional: a Romaría de Nosa Señora da Barca (Muxía), as Carrilanas de Esteiro (Muros), as festas do San Froilán (Lugo), a Feira do Bonito (Burela), a Festa da Historia (Ribadavia), o Entroido de Verín. Tamén a Festa do Marisco do Grove, as Festas de San Roque (Vilagarcía de Arousa) e a Festa da Reconquista (Vigo).