[:gl]Novas[:es]Noticias[:en]News[:]

• Esta campaña, posta en marcha por Turismo de Galicia en colaboración con Renfe e o Inorde, oferta 11 rutas por toda a xeografía galega.
• Esta modalidade de turismo combina viaxes en tren con visitas a lugares de especial interese turístico.

A campaña dos trens turísticos de Galicia, unha iniciativa de Turismo de Galicia en colaboración con Renfe e o Inorde, xa acadou un 80% de ocupación, cubrindo ata 1.650 das 2.040 prazas ofertadas.

Esta modalidade de turismo combina viaxes con visitas a lugares de especial interese turístico de toda a xeografía galega. Trátase dunha iniciativa que se leva desenvolvendo desde o 2013 e que, ano tras ano, evoluciona para ofrecer un amplo abano de posibilidades aos viaxeiros.

Este ano pódese gozar de ata 11 itinerarios diferentes: a Ruta dos queixos de Galicia, a Ruta das Mariñas, a Ruta dos faros, a Ruta dos pazos e os xardíns históricos, a Ruta do viño Rías Baixas, a Ruta dos viños do Ribeiro, a Ruta dos viños de Monterrei, a Ruta da lamprea, a Ruta dos mosteiros, a Ruta das camelias en flor e a Ruta experiencia Museo Estrella Galicia na Coruña; estas dúas últimas como novidades que acadaron o 100 % de ocupación.

Estas rutas achegan diferentes paraxes especialmente atractivos do territorio galego, ademais de dar a coñecer produtos enogastronómicos de calidade, a través dun medio sostible como é o ferrocarril.

As diferentes rutas están calendarizadas ata o mes de outubro. O prezo dos billetes é de 45 euros para as persoas adultas e 20 euros para os nenos. Na páxina de Turismo de Galicia pódese acceder a toda a información sobre a iniciativa, mais os billetes deben comprarse ou reservarse nos despachos de calquera estación de Renfe, na web www.renfe.com, en axencias de viaxe concertadas con Renfe, ou a través do teléfono 912 320 320.